麥明詩轉發《識男仔要學麥明詩》表不滿 與陳思銘達成共識刪文和解

麥明詩的母親麥何小娟早前與曾跟唐詩詠傳緋聞、英國升學顧問陳思銘出席一個電台訪談，分享教育經驗。其後陳思銘在Facebook以「識男仔要學麥明詩」為題撰文，稱麥媽媽指女兒細個性格叛逆和喜歡扮靚，去英國讀寄宿學校時，都要揀讀男女校，原因係想「識男仔」。
昨日（2日）麥明詩在其社交網轉發此文章，並反擊寫道：「我阿媽退咗休，早幾日去一啲機構分享吓送個女出國讀書嘅經驗（盛讚麥媽媽自力更生，賺錢養家），同『升學KOL』陳生同場，佢之後寫咗篇文透過媒體發表，首先多謝佢文章嘅kind words，但係佢唔小心引用咗好多我媽媽冇講過嘅說話，可能佢當時聽得唔清楚啦。陳生，我記得你有我直接聯絡。俾個建議，下次隨時send個whatsapp俾我，等我／我媽媽幫一幫眼先publish出嚟，一方面禮貌啲啦，另一方面可以避免寫錯嘢嘅風險。順便講埋，自小喜歡扮靚，會考嘅時候就唔會咁款啦。會考後係就係故意揀番男女校，話晒由小一開始已經讀咗11年女校，再讀女校有可能心理會唔太平衡，轉吓環境可以學習同唔同人相處啫。不過的確，我阿媽真係好放手俾我去experience同埋試我想試嘅嘢，佢再從後支援，呢樣嘢我自己覺得好正。Lunch hour都過咗lu，冇乜嘢我返出去做嘢先。」其留言獲網民大讚有禮貌兼EQ高。
數小時後，麥明詩將以上文章刪除，然後再寫一段新留言：「萬事以和為貴，經過溝通之後，了解到陳先生的好意，雙方各有誤會，為互相尊重及以免再為公眾添麻煩，大家同意一起移除文章，謝謝大家」。