姜濤因負評曾要求公司雪藏自己 直認唔夠擔翻睇《叱咤》片

姜濤唔夠擔翻睇《叱咤》片！

姜濤今年元旦在《叱咤頒獎禮》，因身形暴脹及跪地演出惹負評。之後他閉關兼絕迹社交網，直至4月初再次踏上舞台參與西九音樂節演出。姜濤今日（31日）現身商台宣傳新歌，直言這首歌是用來自嘲年初時叱咤頒獎禮上的表現。他說：「呢一首歌係『插班生』，我喺《叱咤》前已做起咗啲歌for今年，但嗰件事之後，我冇諗住再出歌。其實我諗住今年唔出歌，想俾自己安靜一年，但係聽到呢首歌嘅Demo時就有個新諗法，我都幾想笑自己，不如出一首咁樣嘅歌都幾得意。」

姜濤坦言當日在頒獎禮的表現，說對自己沒影響就假。他說：「通常我一落台就會睇番自己嘅表現，嗰陣已覺得有啲唔對路，但冇諗過係海量式嘅報道，覺得係我呢5年嚟一個最Deep嘅時期。嗰幾個月，我有同公司講不如我停一陣先，我自己要求，不如你哋雪我吖！哈哈！因為我希望有一段時間思考番啲嘢。前嗰幾年，無論係MIRROR或者個人都衝得太快，太多嘢太快得到就好易迷失。」

加油啊姜濤！

姜濤透露他在個多月後才敢翻看在頒獎禮的表演片段：「真係唔夠膽睇！有一日，我的起心肝開咗個電視，屋企個電視仲要好大，我喺最近嘅位置睇，一定要搞清楚發生乜嘢事先，唔可以去逃避呢一件事。我有本簿寫低每次表演嘅檢討，嗰時真係唔夠膽。我開電視睇，捱過咗嗰3分鐘。同大家一樣，我都好難捱！不過，我睇完覺得『ok，唔緊要』，同以前一樣發生咗啲乜嘢事就逐步去解決。」問到筆記簿上寫了什麼？姜濤說：「減肥先囉！我當然寫低咗自己乜嘢缺點，但要講會2、3點都講唔晒。」

相片來源：謝茜嘉@Instagram，商業電台 Hong Kong Toolbar@Youtube