都市人辛酸史插畫超有共鳴！俄羅斯插畫家耐人尋味畫風 點出日常生活苦事！

香港人工時長，就連日常生活都可能會感到好大壓力！但其實唔止香港，其他國家都有好多生活辛酸事㗎！來自俄羅斯插畫家Anton Gudim筆下嘅作品，好多都以諷刺社會問題、生活辛酸為題材，如果覺得生活苦悶，放心啦絕對唔止得你一個在捱啊！

Anton Gudim筆下作品非常貼地而且耐人尋味，所謂「耐人尋味」就係有種莫名其妙，睇落又覺得幾好笑，但又講唔出咩一回事嘅感覺，唔知大家睇完Anton Gudim以下作品，又有無呢種感覺呢？

最常發生當然就係返工放工迫地鐵啦！落車嘅次次都好似要摩西分紅海咁，出面勁多人出到出唔到啊！而上車嘅當然就係隨時迫到貼住玻璃又焗又辛苦，但最慘係反而會慶幸自己上到車⋯⋯

而家電子科技發達，溝通越嚟越方便，但反而出現另一個問題！明明同枱食飯，重視嘅人就係旁邊，但都係習慣用手機聯絡，或者搵其他人、碌下IG/FB咁，大家都忽略咗身邊人，無時無刻都成為低頭族啦！

另一個超有共鳴就係，每日返到屋企好攰無曬電，諗住瞓較叉下電，點知第二日依然好似無瞓過咁攰！最慘係仲要返工嘛～

有時喺工作上跌倒、失敗，身邊都無人會支持、鼓勵同扶持你，唔知大家睇到呢幅插畫又有共鳴呢？

打工仔就係星期一到五嘅疲勞不斷累積，就好似雪球咁越滾越大！

生活就係不斷工作、工作同工作，Gudim喺畫中仲好幽默咁表達出不停工作嘅辛酸，就係除非你已經「Life is passing by」(生活已死去)，如果唔係都要繼續工作啊。

仲有一個好有共鳴就係，每日都好似帶假面具咁笑臉迎人，但內心其實非常憂傷，相信Gudim畫出咗好多都市人嘅心聲。

其實Gudim嘅畫唔係咁悲觀嘅，畫出嚟都係想大家正視日常生活中可能會忽略嘅問題、病態。而且Gudim另外仲有好多作品都係圍繞生活，但非常奇怪同耐人尋味，大家不妨睇下、笑下、輕鬆下啦！

圖片來源：IG@gudim_public

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知?大家可以透過Facebook inbox、或者send e-mail到holiday@presslogic.com，直接將資料傳比小編）

歡迎關注我們的 Facebook 與 Instagram