除左4-5年前因工作，要不時往來上海、廣州、深圳外，其實我都好少返內地。但今次有機會番國內比賽，真係要多謝 Salomon 同 Suunto 俾機會我上去開下眼界，真心估唔到國內賽事可以咁有規模，比香港不少賽事都搞得更要好。
柴古唐斯越野賽成為近年國內最火熱既比賽之一，相信是因為2017 Salomon 教父帶一班 international Elite 來舉辦精英訓練營有關，例如，香港好熟悉既國內好手鄧國敏，就係2017精英營出來既精英跑手。所以柴古唐斯能吸引不少高手參加，好似 Hayden Hawks (ITRA 923，CCC，Lavaredo 冠軍)，祁敏 (2018 CCC 亞軍，HK 100紀錄保持者)，姚妙 (2018 CCC 冠軍，HK 100紀錄保持者)，賈俄仁加 (2018 OCC 冠軍)………etc 可見精英雲集，比賽含金量極高!
比賽簡介
今年比賽有3個組別，分別為110km，80km 同50km，有近2500人參加! 而小弟一向穩陣，由於怕人生路不熟，又驚水土不服 (因為我係勁易肚痾既人)，所以我決定先體驗下50km，玩過一次之後先再挑戰再高里數。而最後，我都覺得我決定係無錯……HAHA
註:今屆柴古唐斯越野賽的完賽率: 110km: 38.7%、80km: 33.3%、50km: 87.2%，所以話完成已不簡單!
賽前會場佈置及race pack安排
大會取 race pack 及簡介會位置，位於臨海體育館。會場佈置得唔錯，氣氛亦好好。簡介會邀請左一眾精英跑手在台上分享。好認真，好有規模……真心讚!
一如好多國際賽，都是要先 Gear Check 後先可再取 race pack。而 Gear Check 亦十分認真，要經過5、6個關口，工作人員會攞著個 Checklist 同你逐樣對，缺一即叫你走……好嚴格，好認真同我上年去過既 UTMF 有得揮。過5關斬6將後……終於攞到 race bib，而手帶會即時幫你帶上避免你找替腳。
比賽日
當日不停下雨……預左都係爛地戰一場! 如果要簡單咁講賽道係點，就四個字: 先苦後甜。頭半程主要為攀升較多，後半程為下坡為主，只要留到力係落山衝，就可以賺番好多時間，所以建議大家可以選擇留前鬥後。而我當日比賽算是成功，在頭半程排名為73，最後在後半程追番近30名!
頭半程28km
一開始4km為平路跑，圍繞著名的江南長城跑一圈，之後入山後，主要為攀升較多，而且中間混集爛泥地，濕滑青苔石，跑起上來都十分費力。特別在12km之後，路況都幾差，啲爛泥地跣到PK………老實講著乜鞋都無用，我自己都跣左幾次，全身都係泥。有唔少人都要「屁降」，pat pat 落地 sir 落去……而熬過頭20K左右，狀況就會好好多，慢慢會多啲可跑性較高既路段，頂到28K既 CP 就一天光晒!
CP飲食
來之前，我最擔心的就係CP飲食，因為我係勁易肚痾既人，驚水土不服。所以我賽前係準備晒自己食物，但估唔到 CP 飲食比想像中好好多，甚至好過好多香港賽事。最後，我揹上身既 power bar 一條都無食過……白白揹左全程。
後半程23KM
熬過頭半程就一天光晒，多番好多可跑性較高既路段，特別最段9km，就好似跑大帽山波波一樣再加D 石樓梯，可以全速9衝落去，嬴番時間就靠呢一段……..香港跑手發揮既好時候，個段路我都追過左唔少跑手!
落山後，就係馬路一直隊多4k左右就衝線到終點! 而最後既路線 setting 好有心思，最後衝線前300m係入村路段，好有氣氛，左右兩旁既途人不斷為你打氣……感覺十分興奮，有啲 UTMB 衝線 feel。
就係咁，我用左7個鐘左右以44名完成了51.5km 的賽事，總算安全完賽。
賽後虛榮
最後真係好彩追番上來，趕及頭80衝線，因為原來頭80名的跑手有好多正野。首先，可以得到特別版的紅色虛榮戰衣，是有專人即場打印名次上去。之後再有專業攝影師為你影大頭沙龍，嗰一刻即係覺得自己成個人Elite 左……hahahaha
虛榮完之後，我定個神望一望自己……我感覺: 我覺得自己好噁心，係一個壞左既人，我只希望可以俾我時間，盡快清洗一下自己……如果咁番酒店，我怕酒店會 blacklist 我，唔俾我入房。
其他完賽福利
小知識
“柴古唐斯” 起源於台州本土方言—— “柴給你吃” (揍你一頓)，寓意為柴古括蒼越野賽強度大、難度高，跑完全程後的感覺就猶如被狠揍了一頓，戶外越野圈更是戲稱其為“拆骨躺屍”。
資料來源: https://bit.ly/2Up1X9y
Fitz連結: https://fitz.hk/?p=118279
更多:
Fitz Facebook專頁
[HK168賽後感] 如何建立 / 把握你的小高峰
[Dark 45 賽後感] 那夜凌晨 我坐上了來回城門的外星紅VAN
[逆轉反勝] 與 Salomon 神人們玩接力
[HK100賽後感] 有種福氣叫「食得跑得」
[有毒慎入] 識玩，一定要帶女友去玩呢個 (前篇)[怯~你就輸了!] 一對踏上大賽頒獎台的地球人壞人 Ryan@FitzFitz Running 跑步
文章為作者意見，不代表Fitz立場。
歡迎投稿: https://fitz.hk/contribute/