早前，再見亦是朋友嘅湯洛雯（靚湯）及羅天宇以好朋友身份遠赴挪威拍攝TVB節目《3日2夜》。點知，日前二人分別喺個人社交網上載於當地拍攝嘅靚相，望落啲相就連網友都話係以情侶視覺影！
欽點以舊情侶檔拍節目
早前靚湯孖住前度羅天宇齊齊現身機場，仲被斷正一齊攞住行李去旅行！事後接受訪問時，二人就表示今次係為工作而一齊出發搭飛機去挪威拍外景！
訪問期間，靚湯就坦言雙方依家係好朋友關係，仲話：「我哋呢個組合先至冇嘢呀，有嘢就唔會嚟啦！」，最好係咁啦，皆因最怕其中一個諗多咗都唔好啦～至於問到男方介唔介意同前度女友但變現時好友嘅靚湯合作，羅天宇直指：「初初都有少少，依家冇啦！」
然而二人訪問期間不時強調雙方只係好朋友關係，但言談間亦不難發現呢對舊情人之間嘅默契，例如當羅天宇講到：「今次都幾期待，因為我未去過歐洲㗎！」靚湯就立即加嘴指：「係呀！佢未去過歐洲㗎！」，完全曝露出對對方嘅熟悉程度！
唔少人都好期特呢兩位舊情侶、現身份為好友嘅靚湯及羅天宇喺拍攝途中會擦出啲咩火花，不過當時見雙方喺接受訪問期間都笑晒口就知今次旅行一定會好開心啦！
狂互晒情侶視覺相
據知二人已抵達當地進行拍攝，當然唔少得寓工作於娛樂啦～靚湯就喺個人社交網晒出喺挪威影嘅靚影，見佢張張都笑容燦爛之餘，更唔難察覺當中唔少相原來係同羅天宇一齊以情侶視覺影低嘅！
二人同時晒出靚相，見背影都一模一樣，男嘅影得女滿面笑容相當歡愉，而女嘅亦影得男最型仔一面，睇嚟雙方不約而同地表露出最自然及真實心情一面之餘，亦喺視覺下影低對方喺自己眼中最美一面！
二人各自同狗狗合照，為對方做揸機人，成個畫面都充滿住愛！大家睇下隻狗狗幾冧！
靚人配靚景，令人非常賞心悅目之餘，更令網民質疑雙方成功暗撻！
網民期待二人復合
靚湯喺IG留言問粉絲「你們期待嗎？」，竟然有網民講到明話「期待你同羅天宇復合多d」、「如果你地返嚟之後宣布復合，我會再一次相信愛情」等。
雖然暫時仲未見到二人嘅合照，不過見到靚湯同羅天宇影嘅靚相，更令人期待有由佢哋主持嘅《3日2夜》播出！
即時回顧：
湯洛雯未忘前度？
話說，湯洛雯同羅天宇雖然於上年承認分手，但事後女方好似一直對於前度念念不忘之餘，亦未能放下與前度嘅一段感情，不時於個人社交網post出眉愁不展相兼感觸留言，似是無聲仿有聲！
湯洛雯 傳撻着姚子羚前度
之前，有人向傳媒報料兼提供相片，稱目睹兩人日前深宵在銅鑼灣一樓上酒吧夜蒲，當晚兩人黐到實、貼晒身互摸，靚湯仲被「的士邦」伸手摸大髀，而靚湯都有出手摸住佢條腰同背脊，親暱舉動如情侶。
靚湯接受傳媒訪問時否認拍拖，話當晚只係大家一班朋友出去慶祝朋友生日，同「的士邦」係朋友，靚湯仲堅稱自己仍然單身，又話如果有好消息(拍拖)一定會同大家分享。
講到點解啲相見男方下半身貼住佢？，靚湯就話明顯係角度，根本冇貼住，仲話畀人咁寫都有啲唔鍾意！
睇番啲相，當晚其實係「皮草大王」王大業生日，唔少圈中朋友都有出席，好似周汶錡、龔嘉欣、莊思明、莊思敏等等！
湯洛雯情傷未癒失調暴脹
湯洛雯與羅天宇拍拖四年，一心以為憑著愛可以征服浪子，二人由合作《愛.回家》開始地下情，去年分開再復合，在羅天宇慶祝30歲生日時，一張甜蜜咀嘴相被公開戀情才浮面，可惜亦逃不過見光死的命運。羅天宇命犯桃花，湯洛雯一直逆來順受，男友未定性未肯為她放棄整個森林，最終成為分手導火線。
據知情者透露 :「 靚湯 (湯洛雯)以為公開咗拍拖可以令Joey(羅天宇)少啲女埋身，但事實唔係咁，一齊咁耐男方都好爛玩，畀唔到安全感佢，佢一直等，不過都係等唔到。話就話係和平分手，Joey仲係不時會冧吓靚湯，好似想翻撻咁。」
據知情者透露 :「靚湯唔係冇選擇，只係佢份人好長情又易心軟，10月1號Joey生日，佢班好姊妹都勸佢唔好去，唔明點解到依家都要幫佢營造好男人形象，之前已經傳佢同陳瀅去拍拖睇戲，早幾日又畀人影到同前無綫巨胸小花范彩兒出街，靚湯睇完啲報道非常唔開心。」
知情者繼指：「其實呢半年嚟佢情緒都麻麻，段感情似有還無，搞到佢身體失調仲暴肥。」
湯洛雯IG發文悼舊情
一臉茫然加上文字似乎都在懷緬過去，「有時候某些重要的時刻在變成回憶後才知是多麼的可貴！」
日前湯洛雯在 IG放咗張憂鬱相兼感性 留言:「愛累了，就放手，人累了，就 休息，心累了，就淡然。」令到唔少網 民都擔心佢，追問佢發生咩事。
湯洛雯另一張眼神憂怨望向遠方的相，好像滿懷心事，再配上五月天《後來的我們》的歌詞，最後一句「淚水中能看到你真的自由了」，似是若有所指。
羅天宇08年選香港先生入行，雖然仍未上到一線，但媾女戰績勝過不少當家小生，被封女神殺手，與他傳緋聞拍拖的女藝人個個都樣靚身材正!
｜林芊妤(Coffee)
Coffee跟羅天宇因拍攝《南華夢飛翔》而認識，有傳 Coffee是羅的初戀女友，被朋友公開二人床上親密 照後才爆出曾經相戀。羅天宇承認曾經跟Coffee拍 拖，照片是女方拍的，不過很快已經分手。
|苟芸慧
華姐冠軍苟姑娘比羅天宇大四年，入行後即發展姊弟戀，戀情一直不被看好，加上受到無綫多番施壓，10年二人對外界指以事業為由，和平分手。
|高海寧
與苟姑娘分手後，有傳羅天宇與高海寧因為拍攝劇集《法網狙擊》而撻着，更被影到相約到深圳按摩，但他們之後均否認戀情。
|陳瀅
陳瀅與湯洛雯分手後，即傳出羅天宇與陳瀅拍拖睇戲，為保戀情女方更刻意提早離開戲院，緋聞傳出後，陳瀅多次公開表示與羅天宇無可能，甚至形容報道是「質佢食死貓」。
表面上湯洛雯與羅天宇分手已有一段時間，但靚湯密密在IG 發文似是放不低舊愛。早前與張振朗為新劇《機場特警》開鏡，更被嘲笑大隻過男主角。其實31歲的靚湯是無綫力捧花旦之一，與其花心思在冇結果冇將來嘅感 情上，不如努力工作向上爬，做咗當家花旦等花心男後悔走寶仲好啦!