正Game真係一浪接一浪啊，先係上個月啱啱先出咗《審判之逝 湮滅的記憶》同 年中出咗小編至愛嘅《Resident Evil Village》，今個月又有幾款新嘅大作啦！除咗有舊作翻炒同續集遊戲之外，仲有由人氣動畫製作而成嘅新動作遊戲！唔知係咪就嚟萬聖節，十月恐怖題材嘅Game都多咗好多〜係咪想知邊一隻game最值得買呢，即刻碌落去睇吓啦!
圖片來源︰Playstation、巴哈姆特｜撰文︰Debbie
PS5 Game推薦（1）-《吸血鬼：惡夜獵殺 血獵》
首先打頭陣嘅呢隻Game，係被譽為“Vampire版嘅食雞”大逃殺遊戲。玩家要利用自己嘅超自然能力、武器同智慧去稱霸黑夜！玩家可以選擇個人或者三人組隊搵人Carry，喺一場最多四十五人嘅情況下為生存而戰，遊戲亦提供唔同氏族為其效命，而每個氏族都各有特色，有啲具有強大侵略性嘅力量，有啲就可以隱身戰鬥，等玩家可以依照喜好嚟做選擇。個人認為免費game嚟講，呢隻算係相當高質～故事性強，仲可以多個玩家同時進行遊戲，無論係畫風定流暢度CP值都高於水平！目前已經係Steam平台上架PC版，相信PS5玩家亦都可以好快到！
《吸血鬼：惡夜獵殺 血獵》
售價：免費
類型：殺戮、動作
上架日期：TBC
PS5 Game推薦（2）-《零～濡鴉之巫女～》
《零～濡鴉之巫女～》係一款日本心理恐怖遊戲，亦係《零》系列中嘅第5部作品而且仲係首次支援繁簡中文嘅遊戲添！《零》系列遊戲邁向 20 周年，除咗會以高畫質姿態回歸玩家眼前外，新版仲追加咗「拍照模式」同幫主角變更服裝上嘅設計同新增服裝幾個功能。值得一提嘅係，唔好以為三位女主角生得咁可愛，隻game就會係cutie路線！其實佢係一隻限制級嘅恐怖遊戲，利用相機功能去擊退惡靈亦要喺恐懼氛圍下解破謎團，鍾意懸疑嘅你哋就啱曬啦！
《零～濡鴉之巫女～》
售價：HKD421起
類型：恐怖
上架日期：10月28日（可預購）
PS5 Game推薦（3）-《極地戰嚎 6》
圖片來源： PlayStation
同前幾作一樣，極地戰嚎6將會帶領住一班玩家前往一個風景旖旎嘅地方展開新冒險，而今次嘅戰鬥舞台位於雅拉，一個地處加勒比海被人稱作「時間彷彿靜止嘅熱帶天堂」的島嶼群。呢款遊戲雖然出到第六部作品，但同前作故事冇任何關聯，所以未玩過呢隻 Game嘅玩家都唔使驚劇情唔知講到邊。以第一身角度為主嘅射擊遊戲嚟講，呢款絕對係推薦之作，除咗畫質一代比一代好之外，角色亦漸漸人性化！相對前幾部嘅主角沉默寡言，六代應該有最Fun最多嘢講嘅遊戲主角，玩嘅時後記得留意吓小細節，話唔定可以帶俾你唔少驚喜㗎！
《極地戰嚎 6》
售價：HKD468起
類型：射擊、第一身視覺、刺激
上架日期：已發行
PS5 Game推薦（4）-《鬼滅之刃 火之神血風譚》
改編自人氣日本動畫《鬼滅之刃》嘅全新PS5遊戲終於上架喇！《鬼滅之刃 火之神血風譚》係一款以動畫《鬼滅之刃》為原作改編嘅「鬼殺對戰動作」遊戲。玩家可以體驗原作故事篇章從「立志篇」到「無限列車篇」為止，除咗有單人模式之外仲有雙人打鬥同組隊模式添。雖然玩法同一般雙打、單挑PC差唔多，但身為鬼滅迷，睇遊戲體驗版嘅時候不得不讚嘆佢哋遊戲動作嘅流暢度同清晰度都非常滿意！遊戲彩蛋亦都收錄咗《鬼滅之刃》衍生的官方外傳作品《國中高一貫！！鬼滅學園物語》入面嘅六位角色，到時又可以見到禰豆子咬麵包著校服嘅樣喇！
《鬼滅之刃 火之神血風譚》
售價：HKD498起
類型：雙打、劇情、單人、動作
上架日期：已發行
PS5 Game推薦（5）-《心跳文學部 Plus》
呢隻RPG真係不得了！唔好睇佢啲囡囡嗰樣又Sweet又靚就以為玩緊純愛Line嘅遊戲，表面上披著美少女戀愛遊戲糖衣，但實際上佢哋就係逐啲逐啲慢慢侵蝕你地心靈，漫不經心咁塑造詭譎氛圍，帶俾大家超乎想像嘅身心衝擊嘅視覺小說型遊戲！以往玩過呢隻Game嘅玩家都揚言早知遊戲係咁嘅話，係唔會玩落去嘅，究竟係咪真係咁誇張？你又夠唔夠膽去試吓呢？加強版遊戲《心跳文學部 Plus》，主打將所有圖像全面提升到 1080P 高畫質，額外加入咗六段全新支線故事、新事件 CG 、幕後花絮同Bgm等額外內容。想知係咪真係咁堅就要玩吓先知啦〜
《心跳文學部！PLUS》
售價：HKD81
類型：愛情、恐怖、驚慄、RPG
上架日期：已發行
PS5 Game推薦（6）-《黑相集：灰冥界》
《黑相集》系列嚟到第三部，係一款以獨立電影式營運嘅恐怖遊戲。透過玩家個人選擇去決定每個角色嘅最終命運及後續劇情發展。呢個遊戲嘅特別之處就在於有三款遊戲模式，其中包括單人、二人合作以及同時與五位玩家遊玩嘅電影模式令大家都可以一齊經歷呢個驚悚恐怖嘅全新體驗！而且每個環節嘅決定都會影響各自故事走向，所以未去到最後都唔會估到個結果係點㗎！小編就最鍾意呢種類型嘅遊戲，對上一次吸引小編嘅Game已經係《底特律：變人》，同樣都係與玩家互動嘅人性題材。有唔少粉絲都非常期待，第三部嘅《黑相集》會有咩驚喜呢？
《黑相集：灰冥界》
售價：HKD219
類型：恐怖、驚慄、電影、劇情
上架日期：10月22號（可預購）
相關文章：【任天堂Switch Online Store游戲限時減價！ 多款熱門遊戲低於$100！】
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/