昨晚（3日）鍾嘉欣 在TVB盛事《萬千星輝頒獎典禮2021》再無緣視后寶座，只獲頒被稱為「安慰獎」的「大馬視后」。雖然大量網民於TVB社交平台下留言狂鬧頒獎結果違背民意，紛紛為她感到不值。不過她自己卻表示心情輕鬆，事後更收到老公的甜蜜訊息，有老公、仔女萬事足。
撰文：Sunday Kiss｜圖片來源：Sunday Kiss照片庫
鍾嘉欣陪跑11次視后夢再碎 網民狂鬧TVB
鍾嘉欣在TVB劇集《星空下的仁醫》飾演章醫生，劇中講述她意外流產，痛失胎兒，情緒崩潰到產生幻覺，不斷痛哭，完美演繹出作為人母的悲愴，撼動人心。儘管奪視后呼聲高，惟她最後仍不敵被喻為黑馬的林夏薇，再次失落「最佳女主角」獎項，只獲「馬來西亞最喜愛TVB女主角」。
鍾嘉欣於03年參選《溫哥華華裔小姐競選》奪冠，04年參選TVB《國際華裔小姐》比賽奪冠，其後加入TVB，代表作有《溏心風暴》常在心、《珠光寶氣》宋子凌、《點解阿Sir係阿Sir》Miss Koo 、《缺宅男女》關嘉樂、《巨輪》Rachel等，獲觀眾大讚演技出色。入行17年來，她曾經獲提名11次視后，可惜每次都與視后獎座擦身而過。
很多支持鍾嘉欣的網民很失望，在TVB Facebook貼文下留言鬧爆，認為鍾嘉欣無可能會輸給林夏薇，連內地網民都好激動，在微博狂鬧TVB：「真是沒天理，我希望全港所有觀眾一定要向TVB示威，還鍾嘉欣一個公道」、「TVB真是有心玩死你啊嘉欣，明知你攞不到獎都叫你出席，TVB正在羞辱你啊，嘉欣你要清醒，不再蒙在鼓裡」、「可憐的鍾嘉欣，入行17年連一個香港視后獎都沒有」、「不知所謂的頒獎典禮，有無數據可以支持林小姐攞視后？」亦有粉絲安慰她，表示會永遠支持她：「你已經做得好好，已是大家心目中的女主角視后了。」
收到老公甜蜜訊息 暗示10年後或再回來
不過非TVB「親生女」的鍾嘉欣卻看得很開，她上台發表致謝辭時說：「唔知道自己仲有無機會上台，祝福TVB。」有網民指她特意回港出席頒獎禮，但無嫁視后，她接受TVB節目《東張西望》訪問時澄清自己是為私事回港，但知道有很多粉絲支持她，所以想親身出席頒獎典禮。
事後她接受傳媒訪問表示自己入行多年很清楚，已一早估到，所以沒有失望。她解釋可能自己做得未夠好，而且成為媽媽後心態改變不少，看化了獎項名利。她未知自己何事會再回來，或者10年後會再有機會。另外她大爆兒子留在家收睇直播，而遠在加國的老公同樣凌晨4時都未有入睡，堅持要看她上台的直播，還被對方大讚好靚，好甜蜜。
罕有暢談與老公相識經過
鍾嘉欣同脊醫老公Jeremy婚後仍恩愛如初，原來二人的根雖然源自加拿大，但相識於香港，種下不解緣。Jeremy早就認識鍾嘉欣家姐，剛巧來港旅行探親，便在香港一間Coffee shop認識了鍾嘉欣，她接受本報訪問時說：「我去見佢都唔係諗拍拖，係諗住識下新朋友，見到面，佢滿口英文、加拿大人，我見咗佢半個鐘，好舒服，傾傾傾，傾到停唔到。之後我夠鐘要走，行出Coffee shop，佢問我地鐵站點去，我突然醒起：『死嘞，呢度中環嚟㗎，好多記者㗎！』嗰排我好多新聞，費事影到相會被炒作，就跑走咗，無教到佢點搭地鐵，因為咁我覺得自己好衰，專登搵佢Say sorry，之後開始聯絡。」其後他們拍拖九個月便結婚了。
她認為自己不是閃婚，一來她和老公年紀都是適婚年齡，大家都比較成熟，二來大家的性格好配合，所以都認定了彼此，三來其實他們已認識了一段時間認識才結婚：「傾偈傾咗幾日，已經有感覺，當然無同佢講『我覺得你係我將來老公』，但心裏面已經keep住呢個感覺。」
喜劇形式的求婚過程
鍾嘉欣表示求婚過程不浪漫，但她已經感動到喊了：「因為佢唔係浪漫嘅人，佢用誠意，中間有好多蝦碌嘅嘢，佢又好緊張，又跪地，跟住有人嚟，驚有人影到，起番身，好多蝦碌、好好笑，反而我覺得呢個求婚嘅片段係喜劇形式。」
讚老公靚仔穩重 被對方讚是好老婆
鍾嘉欣覺得老公是她心目中最靚仔的：「佢喺我心目中係最靚仔，佢唔係情緒型，我係情緒化啲，佢係好穩重，穩到令到我都穩埋一份，佢永遠無論發生咩突發事件或者開心唔開心嘅事，佢唔會被佢嘅情緒帶動到，佢會好清晰地解決或者做事，呢方面嘅淡定我覺得係好吸引。」閒時Jeremy亦會幫忙照顧仔女，一家人喜歡留在家休息：「我哋兩個都好鍾意留喺屋企，無去遊山玩水，商場都少去，我哋最多都係附近行下，好少有咩活動。」
同樣地，Jeremy也覺得她是位好媽媽、好老婆，令他有舒適的居所：「我老公話我係好好嘅太太，我好為屋企嘅，我會準備好晒啲嘢，我老公返到屋企，好舒適㗎，有飯食啦，乾淨啦，又好錫佢啦，都細聲細氣嘅，我覺得OK㗎！」
為女兒老虎都可打死幾隻
回想從前，鍾嘉欣表示生BB過程沒想像中辛苦，當初她擔心順產會唔會十級痛，但到要進入產房、陣痛的時候已經開到十度快要生，卻覺得時間過得很快：「我十幾個鐘陣痛、生個半鐘，但成個過程感覺似三個鐘，眨下眼就完咗。同埋我發覺好得意，神就係創造女人生BB，所以入到產房唔會驚，只會諗要個女健康、安全生出嚟，嗰種母愛同勇敢已經蓋過咗痛。」她又鼓勵媽媽餵人奶，因為好處太多：「每日可以減到五百個卡路里，唔使做運動，我嗰陣餵咗將近八個月已經修晒身。」
當媽媽後的她指自己成長了不少，從前比較自私，不會為人設想，但有了女兒後變得有責任感，不再只顧自己，會為屋企人著想：「我覺得係一個快速嘅成長，因為我結完婚即刻有小朋友，所以突然成長得好快。以前廿幾歲，我比較盲舂舂唔識諗。結婚之後，唔再淨係為自己，要為屋企人諗，成熟咗好多，真真正正明白到母愛係乜嘢。以前我以為我知，同埋我演戲，以為我可以想像做媽媽係點，直至自己親身生BB、湊BB，我先明白到嗰種母愛係大到用言語係形容唔到。」
讚女兒不愛扭計超級乖
鍾嘉欣表示女兒小時候超級、超級乖，不扭計、不哭：「囡囡除咗夜晚臨瞓前會喊三、四分鐘，跟住自己就瞓，瞓八個、十個鐘就起身。同埋我覺得佢係思想型嘅，點解呢？因為佢唔介意無人陪，我要煮飯、處理家頭細務，唔得閒下下抱住佢，我亦都唔想縱壞佢，我每朝起身，幫佢換完尿片，擺佢喺play mat，畀啲公仔佢，佢就自己玩一餐，所以我覺得佢鍾意喺自己世界、鍾意自己諗嘢。」
她形容自己是個輕鬆隨意的媽媽，不會一開始就計劃要讀什麼學校，希望女兒能夠自己玩，在自己世界創造新事物：「我細個屋企環境唔係咁好，無得學任何嘢，依家我覺得我哋性格、工作任何嘢都OK吖。好似我細個原來已經鍾意演戲，爸爸媽媽返工，我會摷曬我阿媽啲絲巾綁喺個頭扮女俠，又扮拍拖、分手、唱歌，所以我哋想留意佢、觀察佢，發掘佢嘅喜好，到時先慢慢畀佢學， 唔會一嚟乜都學晒，我覺得會過火咗。 」待女兒長大後，她亦會讓女兒看自己的劇集：「可能俾《搜神傳》佢睇，係我入行第三部劇，訊息好好，可以教佢點孝順父母同樂觀面對人生。 」