絕殺贏國家打吡，喺西甲榜首領放12分之多，以巴塞隆拿近日（乃至近年）咁低迷嘅氣氛底下，終於有個可以大肆慶祝嘅理由。
專門用嚟mark實皇馬左翼雲尼素斯嘅阿羅祖，今場波唔好彩先自隊烏龍，但羅拔圖、基斯爾上下半場末段先後入波，以2-1擊敗死敵皇家馬德里。巴塞賽前有柏迪、丹比利呢兩個主力缺陣，偏偏喺翼鋒同中場嘅配置上，巴塞領隊沙維所做嘅變動，都為球隊帶嚟奠勝嘅契機。
右翼拉芬拿近日狀態唔錯，出波變幻莫測，近3場西甲平均2個關鍵傳球，先前兩場對華倫西亞、畢爾包贏1-0，都係由拉芬拿攻入全場唯一入球，令安察洛堤不得不重點針對。皇馬4-2-3-1嘅陣式下，防守時將左翼雲尼素斯向前移，右翼華維迪向後組成四人中場線，為後面嘅四人防線提供支援。如此一來，可以減少拉芬拿向前突破嘅空間。
不過，喺重重防守下，拉芬拿呢場波都有足夠嘅威脅，上半場一個射門考驗到古圖斯嘅反應，吹半場雞前嘅射門更令羅拔圖補射得手。
柏迪一個月前開始缺陣，雖然呢段時間以嚟巴塞都贏咗3場波，但面對皇馬緊密嘅防線，單單加維難以帶領球隊打出更具穿透力嘅組織。呢場波最大嘅驚喜，莫過於羅拔圖喺呢場咁重要嘅比賽正選上陣。中場佈置嚟睇，沙維大可以將加維收返入中場，再派上法迪/托利斯打正選，又或者用基斯爾嚟做中場更強大嘅拚搶。
「我揀得羅拔圖，係因為佢更加清楚隊員嘅企位同組織。」沙維話，呢場波唔想有太多無謂嘅甩波，所以用羅拔圖嚟加強傳控。之後沙維變陣，加入基斯爾、費蘭托利斯，以應付皇馬愈嚟愈多施加嘅壓力，同時增加長傳快放突擊嘅成分。
基斯爾今場做後備補時埋齋，老實除咗關鍵入波之外，出場20分鐘表現平淡。/但有時，足球就係需要呢種靈機一觸嘅時刻，為比賽畫上句號。而沙維嘅決定的確收到成效，巴塞上半場射門9比2，作為球隊隊長之一嘅羅拔圖一直被質疑能力不足，今日一個入球喺國家打吡追平比數，起碼都出返一啖氣。
阿辛斯奧82分鐘嘅奠勝入波，被VAR以一個差之毫釐嘅越位判決推翻，最後由基斯爾嘅補時絕殺結束比賽。喺巴塞最近被調查有收買球證之嫌嘅背景下，呢個判決肯定會引嚟極大量嘅爭議同討論。但總歸成場波，巴塞嘅佈置有針對到皇馬，喺榜首領先咁多，亦係沙維近日調整有功嘅成果。