多場不勝嘅車路士最終決定辭退樸達(Graham Potter)，終結半年執教車路士嘅生涯，車路士官方聲明表示感謝樸達嘅努力，而Bruno Saltor會成為過渡領隊，盛傳拿高士文成為球隊下一任領隊嘅熱門人選🙌🏻
樸達領軍車路士半年，聯賽方面領軍22場7勝7和8負只得28分，對於一支傳統勁旅實在唔合格，但由第一日起樸達同車路士嘅文化已經係注定唔夾🥵過往樸達係白禮頓嘅成功需要幾年時間慢慢建立體系，而車路士就往往標誌著速食文化即插即用需要馬上有成績，試問樸達有咩可能得到時間重建球隊？
廣告（請繼續閱讀本文）
再者，夏季引入嘅球員係按著杜曹嘅意願同心中板圖，而樸達只能因應手上所擁有嘅球員去踢出佢嘅戰術，而冬季引援估計上佢亦無任何權力，因此樸達只能照單全收🥲當然，引入嘅球員大多都係年輕有活力有質素，安素費南迪斯亦馬上成為球隊嘅中場核心，不過球隊磨合需時，建立默契需時，注入戰術需時，球員領會戰術意思再實現亦需時，去到近期逐漸睇到球隊希望係細空間內短傳配合突破對手，先不論有效與否，至少建立一切都需要時間，特別係推倒重來大換血嘅車路士，安排正選同後備席已經係一大問題，因此車路士領隊呢份工作絕對唔易做。
最後，過往未有執教大球會經驗嘅樸達一下子挑戰大換血嘅車路士，動盪時期無可避免，但多場敗仗實在講不過，因此辭退樸達或許令一眾車迷感到釋懷，畢竟一支Big Six球隊跌落中游實在誇張，而辭退樸達又會否間接證明美國班主保希利當日辭退杜曹嘅決定係錯呢。
Follow 足球港場Instagram
廣告（請繼續閱讀本文）