麻利深夜出文 千五字承認離開商台：你哋冇人轉過工咩？

昨日傳出在商台當DJ的麻利將離巢，而商台之後亦回覆傳媒指「雙方達成共識」麻利暫別包括《口水多過浪花》等節目。到昨日深夜，39歲麻利終於在社交平台出文，足足超過千五字，劈頭就指：「唔知點解就係有一份工，返唔返工會有人知、放假會有人知、返工時間覆到message又會俾人知點解你可以覆message，所以唔再返工又係人人都知。」

在商台網站已經見不到麻利的資料，而《口水多過浪花》則會有DJ傑朱頂上，至於周日的節目《Mali Mali Home》則變成Woody主持《叱咤樂壇 Brand Yourself》。麻利在深夜出長文，當中提到：「人生總有啲位置好想郁，但係如果冇足夠嘅動力，又係留喺原地。」而之前中了COVID 19亦是契機：「有大量嘅時間去思考人生。喺我最高燒嘅時候，我覺得內心都係平靜嘅，因為我聽到自己嘅心跳聲。然後我就發現，原來最昂貴嘅係內心嘅平安。好返之後碌ig，咁邪有見到一個post “if it costs your peace it’s too expensive “，跟住內心湧起咗一份堅定。」
「我好憎交代任何嘢，因為我性格係俾人問多兩句就覺得你而家想講乜呀？你係咪懷疑我先？你想我點吖？尤其係！人生一啲比較大嘅決定拎出嚟討論，一定係有人俾意見，但佢會用佢套價值觀勸你諗清楚。我試過太多次，所以到我真係有啲唔想動搖嘅想法嘅時候，我再熟嘅人都冇講，直到我做咗。」
提到轉工：「唉至鬼煩估唔到又上新聞😂你哋冇人轉過工咩？你哋冇經歷過分手但係覺得分手先啱鬆一口氣咩？做到有長期服務金牌呢件事震懾咗我好一陣子，我係變動星座，我居然响日常生活玩咁多嘢嚟呃自己我有變動，然後留喺一個地方咁耐。until 呢個moment it doesn’t work anymore! 不過直到啲大粒佬都message我，我心諗咁真係要寫下，同埋希望唔會煩到公司同事們，我估已經煩咗，sorry sorry……之前仲同friend 講放心啦冇人知㗎唔使講啲乜㗎，點知始終都係要寫。打搞到大家唔好意思。」