「粉紅大佬」司徒兆殷日前喺Facebook出帖，指警方收到投訴，話佢嗰件印有洋紫荊圖案嘅三鐵比賽衫，違反法例。
呢次警方係依照區旗及區徽條例，受理這宗對司徒兆殷進的投訴。根據政府總部禮賓處，簡介如下:
「國旗、國徽、區旗或區徽或其圖案不得展示或使用於商標或廣告。此外，國旗或其圖案不得展示或使用於私人喪事活動，國徽或其圖案不得展示或使用於日常生活的陳設或布置或私人慶弔活動。任何人違反這些條文即屬違法。」
條例涵蓋嘅層面極為廣泛。簡單講，只要唔係由政府授權，無論市民以咩理由去使用區旗區徽，都已經有機會觸犯有關條例。
條例內容超越立法原意
記得立法會當年討論有關條例時，無論官員以至部份議員，都強調訂立條例係希望市民可尊重區旗區徽，以及防止有人惡意濫用有關圖案。而家市民將洋紫荊圖案印喺衫上面，其實動機好單純，只係覺得自己係香港人，以圖案作為身份象徵。有跑友甚至話:
「去到外國比賽，人哋見到我件衫上嘅洋紫荊圖案，就知我係來自香港! 我就會覺得好自豪!」
不過，喺《區旗及區徽條例》嘅「威脅」之下，聽聞有唔少跑友嘅跑衫，都唔會再印上洋紫荊圖案，因為擔心會誤墮法網，惹上官非。
你不能逃避政治
在網上社群，無論跑 group 以至行山 group，經常讀到網友大談「山中無政治」、「跑步不要談政治」。似乎一講「政治」，就會惹到社群污糟辣撻，引起社群混亂。
不過，大家真係可以逃避政治咩?
將軍澳澳景路被該處屋苑「維景灣畔」私有化，路口被封，趕絕單車友。而維景灣畔法團主席，係西貢區區議員陳繼偉。呢位唔鍾意單車友嘅議員，竟然現身於將軍澳單車館，欣賞香港場地單車賽，令各位車友情何以堪?
陳繼偉係民選議員，於2015年區議會選舉，以3014票高票當選，係該區「票王」。
大家唔想講政治，唔理政治，到最後發現政治根本避無可避時，可能已經太遲。
Fitz連結: https://fitz.hk/?p=112602