綿綿頭上飛花 散聚了無牽掛～
近年嘅冬天越嚟越唔凍，就算係以前凍啲嘅時候，香港凍極都唔會落雪，所以唔少人都會趁冬天嘅時候去旅行感受一下落雪嘅氣氛。滑雪呢個季節限定嘅活動，唔搭飛機基本上係無可能實行，唔少人為咗滑雪，特登飛一轉，又或者去開旅行特別安排幾日行程。由近近哋日本、韓國去到遠少少嘅歐美國家，有咁好選擇，唔知揀邊個好？唔同嘅滑雪場有咩特色？今日就嚟睇吓呢十大滑雪國家，plan定跨完年去邊度玩啦～
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
image source：Pixabay
10 奧地利（122筆）
奧地利係一般人比較陌生嘅滑雪國家，不過如果你係滑雪迷嘅話就一定知道呢個地方！土地面積只有八萬平方公里，但係滑雪量居然已經佔咗世界嘅五分之一，呢片地方亦都培養出好多滑雪冠軍，唔少小朋友幾歲開始就已經「未學行先滑雪」。Kitzbühel呢個地方舉辦過接近100場世界錦標賽亦都四次被選為世界最好嘅滑雪勝地可以話係公認世界第一嘅雪場。
image source:kitzbuehel 官網
9 德國（153筆）
德國嘅冬季運動發展得好興盛，歐洲風格渡假小屋再加上唔同類型嘅冬季運動，包括滑雪、雪橇車等等，都好值得體驗一下。鄰近歷史悠久嘅城鎮，除咗滑雪之外，仲可以感受當地嘅文化氣息。奧運同高台滑雪挑戰賽都曾經喺德國呢到舉行。Gebiet Garmisch-Classic滑道有涵蓋唔同嘅難度，無論你係初學者定高手都一樣可以滿足得到。
image source:Garmisch-Classic Skiarea 官網
8 英國（323筆）
英國嘅蘇格蘭有六大雪場，個個都好受歡迎。而Glencoe作為蘇格蘭第一個滑雪中心，早喺1956年已經有設立升降機，位於自然風景區，登頂嘅時候仲可以沿路欣賞吓大自然嘅靚景。貴為全英規模最大、設備最齊全嘅滑雪渡假村，當然都有唔同嘅滑道，適合唔同程度嘅滑雪者，有蘇格蘭最長、亦都有坡度最高嘅，任君選擇～
image source:visitscotland
7 加拿大（329筆）
位於加拿大嘅Whistler係著名嘅滑雪地點，曾經連續四年被獲選為北美第一滑雪勝地，都係2010冬季奧運同殘障奧運嘅舉辦地。滑雪環境嘅水平就毋庸置疑，年年都吸引咁多滑雪友嚟打卡，有機會踩吓呢片曾經有咁多高手走過、滑過嘅雪地，滑起上嚟感覺真係特別唔同～
image source:whistlerblackcomb
6 中國（802筆）
成日覺得要去滑雪就一定要去到好遠嘅國家，其實喺中國黑龍江省都有滑雪場嫁，而且開設滑雪場嘅仲係來自法國擁有80座度假村嘅大集團，質素保證可以放心。入邊嘅環境、裝修都唔輸蝕俾外國渡假村，語言溝通上方便好多，亦都有唔同嘅分級制度，啱曬大人同小朋友一齊體驗。
image source:clubmed
5 法國（1061筆）
法國呢個地方一直都俾人一種好浪漫嘅感覺，加上白濛濛一片嘅雪景，更加令呢個地方有一種高貴嘅魅力。大家都成日聽嘅阿爾卑斯山其實都係一個熱門嘅滑雪勝地，呢度有全球第五大、法國第二大嘅雪場，每年都吸引左好多滑雪愛好者嚟朝聖。夏天係登山者嘅天堂，冬天就成為滑雪者嘅天堂，幾時嚟都唔會失望。
image source:clubmed
4 澳洲（1716筆）
澳洲得天獨厚嘅氣候同環境，造就自然積雪嘅覆蓋率十分之好，平均嘅降雪量都有三米。位於被稱為天然滑雪天堂嘅南半球，香港冬季結束，意味住南半球滑雪季即將開始～喺雪梨大雪山就已經有兩個達到國際水準嘅滑雪渡假村，唔少人都會過去渡過一個休閒嘅長假期，放鬆心情同埋滑返夠本。
image source:perisher
3 瑞士（2134筆）
瑞士可以被封為「冰雪家園」嘅夢幻國度，絕對有佢嘅道理所在。作為一個俾高山環繞嘅歐洲國家，得天獨厚有適合滑雪嘅地理因素，加上令人驚嘆嘅靚景同埋高品質嘅旅遊體驗，被選為全球最佳滑雪場嘅名單之一。瑞士仲有一個世界最長嘅滑雪道同埋最具挑戰嘅雪坡，滑雪迷一定都想去挑戰吓！
image source:visitscotland
2 南韓（3845筆）
南韓係近年嘅旅遊熱點，去到冬天亦成為唔少人推介嘅滑雪初學者入門地點。除咗因為消費比較低之外，好似橡樹谷滑雪場咁，距離市區只需要一、兩個鐘頭車程，滑完出返市區shopping、食燒肉都好方便。《孤單又燦爛的神-鬼怪》出現過嘅滑雪場就喺韓國龍平度假村，滑雪順便重溫一吓韓劇嘅情節，分分鐘遇到靚仔oppa同你一齊滑添呀！
image source:용평리조트스키장
1 日本（5446筆）
日本一直係香港人熱門旅遊景點，全個日本嘅滑雪場有差唔多六百個，有雪國之稱嘅長野縣，大家都成日聽嘅北海道同新潟，相信大家都唔陌生。
為咗配合旅遊業、吸引更多遊客，位於新瀉縣嘅苗場滑雪場仲主打有中文教練，溝通上唔洗擔心雞同鴨講，而岩手縣嘅滑雪場就有推出親子滑雪活動，一家大細一齊玩都唔怕小朋友跟唔上進度無得玩～
image source:Twitter/竜王スキーパーク
【以上圖文為香港網路溫度計調查結果，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2018年12月25日至2019年12月24日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『滑雪勝地』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。