Happy Weekend唔想留喺屋企，但係又想搵個地方靜靜地做吓嘢，有咖啡飲吓又有啲嘢食，今次小編就同大家介紹7間位於上環嘅Cafe。呢7間Cafe都係位於上環，總有一間啱你嘅！
Cafe Life會用時令生果嚟整甜品，近排佢哋就主打嘅係日本香印製成嘅甜品，賣相一流之餘味道都甜而不膩，有香印芝士撻、忌廉蛋糕、生果撻、泡芙同埋巴菲！
Cafe又點少得咖啡呢！除咗普通咖啡，呢間Cafe嘅竹炭咖啡都幾出名，配埋白色嘅可愛拉花，真係會唔捨得飲！
如果唔鍾意食甜點嘅朋友仔都唔使失望，因為Cafe都有提供小食同咸點，配埋咖啡都一樣咁正㗎！ 地址：上環皇后大道中251號太興中心二座地下B&C號舖電話：28106755營業時間：星期一至日 07:30 - 18:30
如果想去下啲與別不同嘅地方飲杯咖啡，不如試吓呢間將洗衣店同咖啡店放埋一齊嘅Coffee & Laundry！
店入面嘅洗衣機係真係用得而又真係有人用，顧客只要用發達通付款就可以使用！有咁多個洗衣機嘅洗衣店買少見少，當然吸引咗唔少人嚟影相打卡啦！
千祈唔好以為間舖頭淨係可以洗衫！食物飲品方面，Coffee & Laundry 都有唔同嘅咖啡同包點所以就算攞部電腦坐低做嘢叫杯咖啡都係一個唔錯嘅選擇！ 地址：上環皇后街1號地下F號舖營業時間：星期一至五 08:00 - 17:00；星期六至日 09:00 - 18:00；公眾假期 09:00 - 18:00
陽光從落地玻璃穿透入點入面，坐喺呢個窗口位做嘢或者傾計就最好不過，仲久唔久會有狗仔經過添！
3rd Space最出名嘅係佢哋Pancake！Pancake唔會太甜都唔會太硬，襯埋杯香濃嘅咖啡就最好不過！
唔鍾意甜點嘅朋友仔同樣唔洗失望，因為3rd Space都好貼心咁提供咸點，由飯到意粉都三文治都應有盡有！ 地址：上環差館上街16號地舖電話：66169905營業時間：星期一至四 10:30 - 18:30；星期五至日 10:30 - 21:30
位於街尾呢間小小嘅Cafe，可以話係麻雀雖小但五臟俱全！如果想搵間cafe靜靜地做嘢，呢度絕對係唔錯嘅選擇，重點係佢超級近上環地鐵站，所以超方便！
如果對咖啡好有要求嘅朋友仔，呢間Cafe可能會係你嘅top pick！由咖啡豆、咖啡機、到咖啡沖調師，BrewBros都精心挑選，務求沖出嚟嘅咖啡都有一定嘅水準！
如果做做吓嘢肚餓，不如叫返個brownie或者三文治醫吓肚呀！ 地址：上環禧利街33號LG層F2舖電話：25720238營業時間：星期一至日 08:00 - 17:30
成日喺IG見到嘅「萬壽無疆」咖啡外賣杯或者瓷杯就係屬於呢間半路咖啡啦！位於古董街嘅半路咖啡除咗沖調嘅咖啡超有水準之外，盛載咖啡嘅容器都係佢超吸睛嘅地方！
位於古董街呢個位置可以話靜中帶旺，會不時有觀光嘅遊客經過。最適合啲唔鍾意太靜嘅朋友仔，weekend攞部電腦嚟呢度做吓嘢都幾正㗎！
半路咖啡都係唔少愛狗之人周末鍾意流連嘅地方，所以如果你都好鍾意狗仔又鍾意咖啡，呢度就啱哂你！ 地址：上環摩羅上街26號地舖電話：95117197營業時間：星期一至日 08:00 - 19:00
呢個門口可能大家都唔陌生，因為經常會喺各社交網站出現，拍廣告或者打卡都好！原來佢就係茶。家嘅門口，如果唔鍾意吹冷氣嘅朋友仔，不妨選擇坐喺戶外嘅地方呀！
茶。家之所以出名並唔係純粹因為環境靚，佢嘅食物同樣出色，甜點同咸點都一樣都有唔少fans，當中綠茶芝士蛋糕更加係鋪頭嘅大熱！
嘢飲方面除咗咖啡，仲有各式各樣嘅水果茶，總有一款啱你心水！ 地址：上環太平山街18B號地舖電話：28589185營業時間：星期一 09:00 - 18:00；星期二 全日休息；星期三至五 09:00 - 18:00；星期六至日 08:30 - 19:00
簡約嘅店舖設計加埋門口呢個超大窗框，每次係出面經過都會不禁被吸引。店舖嘅位置都好充足，所以weekend嚟做嘢都唔驚冇位！
相對起其他嘅cafe，Kaffeine嘅食物款式都相對地多，都係有甜點同咸點比大家選擇！
當然唔少得咖啡啦，仲要有靚靚拉花添！除咗咖啡，Kaffeine都有提供唔同嘅飲品，甚至連手工啤都有！ 地址：上環蘇杭街108號地舖電話：26395100營業時間：星期一至五 08:00 - 18:00；星期六至日 10:00 - 17:00
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**
