馬來西亞拿督千金莊思敏（Jacquelin）自2011年同拍拖5年的歌手吳浩康分手後，雖然一度同導演葉念琛傳過緋聞，但一直未再公開拍拖。直到上年9月終於公開與台灣商人楊秉逸（Brian）的戀情，兩人一拍即合，拍拖未滿1年已經認定對方、情定終生。莊思敏最近更被發現已經在今年2月21日入紙結婚，成功在40歲前「泊岸」！老公楊秉逸同莊思敏一樣都係有錢人，仲被發現係台灣呢間知名茶飲店老闆？
撰文：東方新地｜編輯：Sunday Kiss｜圖片：東方新地
莊思敏40歲前入紙結婚！老公係台灣「柒品茶」店老闆
現年39歲莊思敏自宣布與台灣珍珠奶茶店的老闆Brian拍拖後，可謂愛得黐纏，甚至在情人節時隔空傳情，表示：「親愛的，情人節快樂。雖然現在你在香港，但希望在未來的日子裏我們每天都是情人節。Love you。」
而今日（21/2）就有媒體發現他們已經入紙排期註冊，據知，Brian的中文名字楊秉逸，職業報稱為公司董事，比莊思敏大一歲。
據網上資料顯示，楊秉逸是沛品國際餐飲有限公司負責人，旗下茶飲店是位於文山區的「N.7 Tea Lounge 柒品茶」，門市在去年5月底開業，據了解當時楊氏已經與莊思敏在蜜運之中：
莊思敏舊愛吳浩康分享開心
至於跟莊思敏有過5年感情的吳浩康，去年尾與拍拖不足一年的崔碧珈分手，在IG上暫未有回應舊愛婚訊 ，但都有事情「開心Share」——原來近年愛上越野單車的吳浩康，近日在大欖涌完成了「人生第一場山地車比賽」啦！更成得奪得亞軍。
莊思敏Dry足7年有著落
去年年年初先至話大馬拿督夫人阿媽心急到拉她去相睇，原來唔聲唔聲，莊思敏感情已有著落，早前出席活動，更忍唔住開心share，雖然開始時未有直認拍拖，但亦漏口風表示:「怕小器，都係唔講咁多住!有好消息就會公開!」在前年5月1日正日生日舉行的39歲生日P，就算大班朋友在場，台版吳浩康亦全程陪在身旁。
男友密飛香港探莊思敏
據悉莊思敏同台版吳浩康早於幾年前已經認識，直至上年莊思敏到台灣拍電影，留台一段時間，同男方頻密約會擦出愛火，能夠成功追掂大馬拿督千金，台版吳浩康全靠密集式攻港攻陷芳心，據知情者透露:「佢哋都係開始咗幾個月，Jacquelin好緊張呢段感情，始終Long D戀情要互相遷就，男友又係生意人，本身工作好忙，但幾忙都好，佢每個月一定飛嚟香港幾次探女友，不過，始終男友唔係呢個圈，Jacquelin都 怕佢唔習慣娛樂圈模式，驚啲新聞會嚇親佢，所以拍拖拍得好低調!」
為慶祝拍拖後首個生日，台版吳浩康安排連串生日活動，在莊思敏 生日前夕，二人拍拖遊山頂，當日下午三時許，莊思敏同男友在中環撐 完枱腳，駕車去山頂拍拖，她先將車泊到廣場停車場，之後兩人唔怕人 多，逼入大媽人潮行上凌霄閣睇風景，台版吳浩康望住Jacquelin 更加嗒晒 糖笑到四萬咁口。
莊思敏楊秉逸似足初戀
即使置身人堆仍如進入無人之境，眼中只有對方， 平日成個女強人的莊思敏，更似足初戀淘氣，不停攞手機同男友 Selfie，一時冧笑一時嘟嘴，之後台版吳浩康更逼去買雪糕氹女友，體貼 表現真係未食都甜入心!莊思敏正日生日在其開設的酒吧開P 慶祝，廣邀 好友出席，台版吳浩康全晚如男主人陪伴左右，之後緊接齊飛越南蜜遊。
本刊致電莊思敏求證新戀情，當時她顯得非常避忌：
「大家只係朋友，佢係台灣人，嗰日佢嚟香港我陪佢啫！（係咪想保護戀情？）唔係，只係唔想影響到人！(想穩定啲先講？)有過之前嘅經驗，我都想感情穩定啲先公開！」
話晒等足7年先搵到有情人，39歲莊思敏唔想有閃失可以理解！