《農情家園》（Minari）主題是搬家，典型追尋美國夢的故事。老豆老母家姐細佬一家人由韓國搬到加州，再搬到美國南部荒蕪之地，希望開農場開創新天地。這一切只是老公Steven Yeun的想法，但老婆韓藝璃覺得，你唔好搞咁多嘢啦，開乜鬼嘢農場吖，安份守己，安心打工，養足精神分辨雞公定雞乸，養大啲細路算啦！
地大而荒涼，兩公婆沒事好做又一早生了仔女，惟有不斷爭執吵大鑊。細佬心臟又有事，後來安排阿婆尹汝貞，從南韓來到美國幫忙照顧，但她不識英文又粗枝大葉，與孫仔鬧出不少笑話，又教他在後山那條小河種植Minari，即是水芹菜，將這種韓國常見蔬菜寓意韓國人，總是能夠在惡劣的環境下生存，生命力相當頑強。
生命力頑強，但始終都要生活。作為新移民，還是亞裔新移民，更是八十年代亞裔新移民，天注定被歧視被冷落到極點，就算好似Steven Yeun這樣靚仔，同樣無法倖免；又坦白說，他本來也不信任當地人，農場要開墾水井，起初嫌貴又怕被騙，到最後自己試盡了所有方法，還是要幫襯人家，大大浪費時間。
後來阿婆中風，老公事業持續低迷，好不容易有點起色，老婆再次發難，我要安穩，我要家庭，唔好搞咁多嘢啦，要老公二揀一，事業抑或家庭，棵菜定係我？老公心想，來到美國就當然要實現美國夢，否則要安穩要一世分公雞定母雞，為何當初又要走佬去美國呢？但老婆要維持頭家，又幾make sense！
正當老公老婆準備好擘面離婚之際，回家看到中風阿婆無故在室外燒垃圾，好心做壞事，錯手一把火燒掉倉庫，毁了女婿後路，彷彿她一早就知道女兒想叫停佢老公開農場。韓國片加上結尾唯美地燒屋，不難想起《燒失樂園》（Burning）。
好慘？偏偏這一場火，看來以為是壞事，燒毁了老公的農場夢，卻同時燒毁了他對家庭與事業的人生兩難抉擇，拯救了婚姻，拯救了家庭，拯救了兒子，結果兒子長大後就成為了這個電影的導演，長大後真正實現了美國夢，拍自己的故事放上大銀幕，殺入奧斯卡。
準備移民或身處外地的香港人，即使不是《浪跡天地》主角那樣置身天與地，也應看看《農情家園》，何處是吾家，很多東西只是一線之差，塞翁失馬，穀倉失火，焉知非福。這一代做不到，鬥長命，時間會證明一切。
撰文：「開片有Nic」FB專頁
Leo~ng 成套戲連結局講晒出黎，唔洗睇
2021年04月25日01:38
顯示全部