蘇志威除了活躍於演藝事業，人稱蘇老闆的他亦有踏足商界，高峰期曾開了4間舞蹈學校及3間西裝禮服店，生意長做長有；然而新冠肺炎肆虐，零售業生意大受影響，蘇志威亦不能倖免，旗下部分店舖宣布停業以減開支。但另一邊廂，老婆劉小慧逆市自強挑戰網上創業，設網店賣抗疫用品，在經濟上減輕老公負擔，可謂患難見真情。
撰文、圖片：東方新地｜編輯：YCL
蘇志威疫情下兩店執笠收入大減
一場新冠肺炎疫情，將大小機構生意打到落花流水，生意額步入冰河時期，投資舞蹈學校及西裝店的蘇志威亦被疫情掃冧場，位於美孚的舞蹈學校本月一日停業，下個月中環的西裝旗艦店亦會結業，面對九年來生意上最大的衝擊。據知情者透露：「呢個係大勢所趨，全世界嘅老闆都要面對嘅困難，其實喺肺炎爆發初期，蘇老闆已經諗方法自救，花咗十萬元購買防疫用品，好似口罩、酒精噴霧、搓手液咁，放喺舞蹈學校同西裝店提供畀客人用，舖頭同學校亦加強消毒，但肺炎疫情未受控，冇乜人出嚟消費，亦唔敢聚集喺人多嘅地方，令生意額暴跌都冇辦法，各結束其中一間舞蹈學校同西裝店，都係為咗減省部分開支，可以繼續頂落去！」
劉小慧開網店做到冇停手
蘇志威生意遇上低潮，幸好有老婆劉小慧力撐，夫妻齊心對抗疫境，去年在社交網教人整蛋黃油治療濕疹，火速爆紅做埋KOL，近日開設網店「劉小慧的生活百貨」，轉型出擊大有客路。據知情者透露：「上年做 KOL好受歡迎，小慧已經想搞網店，只係未有的起心肝去做，直至近日為老公嘅店舖同學校，撲防疫用品，見好多朋友都口罩、搓手液短缺，小慧就諗住幫埋其他朋友一齊訂，點知一呼百應，既然咁多訂單，佢先決定發大嚟做，正式成立網店，不過搞網店一啲都唔輕鬆，由搵貨源到安排貨物入口，到傾交收過程都好繁複，而且網上買賣，好多客都要逐一自己去覆，呢排小慧真係做到冇停手，不過佢形象好又係信譽保證，好多貨品一推出已經賣斷市，反應好好，小慧覺得幾辛苦都值得！」夫妻同心其利斷金，恩愛超標的蘇生蘇太疫境當然頂得住！