廣告（請繼續閱讀本文）
廣告（請繼續閱讀本文）
兩年前轉投東亞唱片嘅馮允謙（Jay）雙喜臨門，除推出新碟《Detour》外，年初仲勇奪十大中文金曲的「CASH最佳創作歌手奬」。霉咗近4年，Jay對於絕地反彈覺得好夢幻：「呢隻專輯足足等咗3年零8個月，等到有啲心灰意冷，好彩雨過天青，𠵱家仲得到Sammi鼓勵，信心慢慢返嚟，心情勁興奮。」採訪：方騫平 髮型：Tim Chan@HAiR 化妝：Maggie Lee 服裝：ithk 場地：重慶劉一手火鍋
新碟《Detour》主題為「旅程」，Jay之前曾經歷過一段事業低潮期，零工作兼零收入，個人變得好頹，冇晒人生目標：「當時覺得唔知仲會唔會有唱片公司簽我呢？日日唔知為乜咁做創作同健身keep住狀態，慶幸喺低潮時學會編曲，去旅行散心時又創作咗40幾首歌，其中5首收錄喺專輯入面，總算冇白費心機。」Jay坦言見到張實體碟好感動，「尤其有陳詠謙做音樂總監，王菀之有份作曲，仲有好好嘅宣傳團隊，同埋好似屋企人咁錫我嘅經理人林珊珊及老闆林建岳，每首歌都做得好好。」
讚好Sammi
之前Jay出席公司飯局，同場有老闆及鄭秀文等，提到Sammi，Jay讚不絕口，「Sammi好關心新一輩歌手，因為我有啲歌唔大路，於是問吓佢意見，佢叫我做返自已version，自然會吸納返知音。難得有機會同Sammi傾偈，感覺好似發緊夢咁，尤其哥哥係佢Fans。我梗係有送碟畀佢啦，希望佢會聽，如果將來有機會度身訂造首好歌畀佢更good，好想寫隻快版情歌畀佢，因為佢跳舞好好睇。」