大時大節咁開心少不免會同一班朋友飲多幾杯，有連假就話唔怕飲多啲，但如果第二日要返工又飲多咗可以點算好？相信大家都有經歷過酒後不適嘅經驗，除咗會嘔會頭暈，第二朝仲會頭痛，嚴重啲仲會胃痛同冇胃口。為咗等大家飲得開心之餘，第二日返工都可以精精神神，小編今次醒你7種解酒方法，幫你同頭暈嘔吐講byebye！
1.蜂蜜水：舒緩酒後頭痛
蜂蜜水係其中一個超方便嘅方法，應該唔少人屋企都會有一樽半樽蜂蜜。美國國家頭痛研究基金會嘅研究人員指出，因為蜂蜜中含有一種特殊果糖，可以促進酒精分解吸收，所以可以有效減輕頭痛症狀，尤其係紅酒引起嘅頭痛。
另外蜂蜜還有催眠作用，可以令人極速入睡。如果飲完酒之後一瞓低覺得超頭痛瞓唔到，不如試吓沖杯蜂蜜水飲先去瞓。
2. 番茄汁：舒緩酒後頭暈
番茄汁同蜂蜜一樣富含特殊果糖，能有效促進酒精分解吸收。一次飲用300ml以上（即係多過一罐可樂少少）就可以令減輕酒後頭暈不適。
我知道你一定會問：「咁食番茄得唔得？」都得！但根據實驗證實，食番茄嘅解酒效果會無番茄汁咁好！
3.提子：舒緩酒後反胃
新鮮提子含有豐富酒石酸，酒石酸同酒入面嘅乙醇會形成酯類物質，有效降低體內乙醇濃度，達到解酒功效。提子嘅酸味都有效緩解酒後反胃、噁心等症狀。如果喺飲酒之前食提子葡萄，更加有預防醉酒嘅功效。
4.柚子：消除酒後口氣
將柚肉切粒，再沾上白糖食可以有效消除酒後口腔中嘅酒氣同臭氣。另外，柚子都係解酒良方，如果無一個柚子嘅話，柚子蜜都一樣有效。韓國人特別鍾意柚子蜜，因為韓國人到超鍾意飲酒，柚子蜜可以有效舒緩酒後不適。
5. 乳酪：舒緩酒精吸收
乳酪可以保護胃黏膜，延緩酒精吸收。由於乳酪中含有豐富嘅鈣，所以對於緩解酒後煩躁症狀都相當有效。
6.香蕉：舒緩酒後胸悶
飲醉酒之後第二日好多時都有啲胸口鬱悶嘅感覺，呢個時候可以立即食1－3條香蕉。因為香蕉能夠增加血糖濃度，可以令酒精喺血液中嘅濃度降低，達到解酒目的，同時可以有效舒緩酒後胸悶。
7. 水：解酒基本步
如果你屋企真係乜都無，感都仲有方法嘅！飲水啦！分解酒精嘅時候一定需要水，當身體嘅水分唔夠嘅時候，就會容易出現宿醉嘅情狀，所以飲充分水分，對於減輕頭痛、頭暈等症狀都有幫助！
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**