天氣突然變得涼浸浸，CONY第一樣諗起嘅事，就係打邊爐！雖然火鍋有好多種，不過要數到港人嘅心頭好，台式火鍋一定榜上有名。特色湯底如酸菜白肉濃厚醒胃，麻辣湯底唔會死辣，對於普遍唔係特別食得辣又想過下癮嘅香港人嚟講啱啱好。雖然疫情關係大家飛唔到去台灣打邊爐，不過好彩香港都有唔少台式火鍋，以下6間火鍋店，由過江龍到本地品牌，任食放題到單點精緻配料都有，隨時可以止一止心癮。
1. 最新開幕放題火鍋
剛於9月在九龍灣開幕的「犇殿古早味台灣火鍋」，主打台式火鍋放題，共有4個套餐選擇，價錢每位$178起，除咗可以自選湯底和肉類套餐，仲可以任食多款自助火鍋配料、台式小吃及甜品。當中湯底有8款選擇，包括御膳麻辣鍋、桃膠土雞美人鍋、蕃茄鳳梨美肌鍋、台式濃香沙茶鍋、藥膳紅燒牛骨鍋等，而肉類方面亦多選擇，例如美國牛胸腹板肉、安格斯牛小排、手切琵琶牛肉，更有澳洲M7和牛，難怪一開幕就吸引人龍。
地址：九龍灣偉業街33號德福廣場一期1樓F1號舖
2. 任食鴨血、豆腐
每次赴台必食嘅「鼎王麻辣鍋」，一向以高質湯底、配料，以及任食鴨血、豆腐作招徠，自去年起更於尖沙咀開設分店，無論裝修和菜式都跟足台灣，仲開到凌晨2點。而因應疫情關係，餐廳又推出外賣服務，全港都送，吸引唔少人幫襯。近日佢哋仲喺康城開設分店，想搵食就更容易。
地址：
尖沙咀店：尖沙咀金巴利道26號地下5號舖
將軍澳店：將軍澳康城路1號The LOHAS 2樓202號舖
3. 獨創火鍋版三層架下午茶
走精緻路線嘅「寬巷子」同樣係台灣過江龍，而香港店是品牌全球第一間海外分店，選址尖沙咀，可飽覽維港海景。相比起湯底，呢度更令人注目嘅係火鍋配料，每款擺盤都十分精緻。佢哋近日仲新推火鍋版三層架下午茶，包括多款招牌配料，例如3朵玫瑰造型嘅澳洲和牛牛舌花、牛胸油花及松板豬肉，還有別具創意嘅「墨條牛軋」及「菠菠糖」等。
地址：尖沙咀廣東道3-27號海港城海運大廈地下OT G57號舖
4. 本地薑創意取勝
要數到最早期開始做台式火鍋嘅本地火鍋店，「火鍋撚」必定係其中一間。除咗必點「蜂巢豆腐白湯鍋」和「祖傳秘製麻辣鍋」，佢嘅配料仲相當出色兼具創意，好似將港式點心為靈感創作嘅「水晶叉燒包」及「水晶奶皇包」、「酒糟五花肉」和「午餐肉菜甫餃」等，連飲品都有好特色，完全係集傳統台式與玩味港式於一身嘅火鍋店。
地址：
旺角店：旺角染布房街6號1樓
中環店：中環雲咸街46-48號雲明行3樓
西環店：西環石塘咀皇后大道西554-560號日富里百好大廈地下1號舖
5. 由內到外的台式風味
來自深圳的台式火鍋店「湊湊火鍋‧茶憩」，現於香港設有4間分店，主打特色台式湯底、配料，例如「五色芙蓉鍋」、「紅顔花膠雞鍋」、「海鮮棒棒糖」、「飛魚籽墨魚滑」等。除此之外，餐廳仲供應多款台式手搖茶，而且可以任食鴨血豆腐，讓你品嚐嘅每一口都充滿台灣風情。
地址：
旺角店：旺角太子道西193號MOKO新世紀廣場4樓406號舖
荃灣店：荃灣大河道98號如心廣場商場二期1樓121號舖
K11店：尖沙咀河內道18號K11購物藝術館B1樓B124號舖
K11 Musea店： 尖沙咀梳士巴利道18號Victoria Dockside K11 Musea 6樓608-609號舖
6. 放題任飲酒類飲品
「101手工涮涮鍋」係一間無限時嘅任食火鍋店，佢位於銅鑼灣商廈29樓，能遠眺海景。除咗可以任食多款配料之外，最正嘅係連酒精飲品都可以任飲。火鍋店仲有十多款湯底供選擇，較有特色嘅例如「香辣三杯卜卜蜆涮涮鍋」及「藥膳蟲草花桃膠養生雞鍋」。值得一提嘅係午市套餐都好抵食，幾十蚊一人一鍋，可自選湯底、3款配料、1款主食及飲品。
地址：銅鑼灣登龍街1號金朝陽中心2期29樓全層
