有散戶經常都杞人憂天，在優質股大跌時，每一次都錯過了趁低吸納的機會，結果致富機會離他/她而去，散戶遂抱怨自己缺乏決斷力，希望想法子改變自己人生。投資書籍作者兼股評人龔成認為，事主若想投資成績有改進，最重要是做好兩件事：第一是要「做功課」，認真研究哪些公司業績良好及值得長線投資；第二是看準機會便要出手，若仍擔心風險太高，可以考慮分注買入優質的港股或美股ETF，以做到博取財富增值的同時亦可分散風險。
【Q37444：散戶經常杞人憂天錯過投資機會，點算好？】
龔成老師：
多謝老師回覆，我行動力好弱，每次心中有目標但總是很怕踏出買的那一步。之前建行四元左右想買又冇買。騰訊二百幾三百時又冇買。其實上你堂個時盈富基金（2800）都係低位（15.xx元），你當時都話便宜，可惜我又係原地踏步，沒有趁低吸納。
可能我太保守，我每次都走去做定期存款，英偉達我因為有朋友從事美國晶片行業，4月800幾美元時同我講可以入，預告一定升到1200美元。但我連富途都冇開，拖下拖下，都升到1300元了。
而家我有50萬元儲蓄，唔想做定期了，但又唔敢亂買。老師有冇提議？超過5%回報我就ok了。
讀者敬上
龔成老師分析：
投資心態其實喺投資來講算是好重要的一環，比策略、技巧等更爲重要，因爲投資心態唔好，唔好講會蝕錢，分分鐘會失眠，所以投資心態好重要。
其實投資心態唔好其中一個原因，是因爲你對股票或者企業唔夠了解，從你的言談中，我可以睇得出你好少分析股票。因為你話「上你堂個時盈富基金（2800）都係低位，你當時都話便宜」、「有朋友從事美國晶片行業，四月八百幾時同我講可以入」，可見你買股票只是根據人地既建議，從來無自己去分析。
投資其實好講求獨立思維，好多野都要自己去做判斷，別人既意見唔係唔可以參考，但邏輯喺邊，是否合理，理據喺邊，自己應否相信？
就算你買中，股價升幾倍，但你到時又會問：應唔應該放呢？所以，一連串的問題都是出自於你對投資或企業的不了解，所以，你只會做定期好正常，因爲回報係好確定。
巴菲特曾經講過，不要投資自己不熟悉的行業，如果你對企業唔了解，就唔好勉强，因爲投資是「先想風險，後想回報」。
股價有波動，5%回報喺股票投資來講並非恆常既回報率，當市況唔好既時候，可能股價會跌到你唔信，我經常收到讀者來信，唔係買左劣質股，而係持貨心態唔夠強，經常提心吊膽。
如果無承受風險的心理準備，建議唔好投資股票；如果真心想開始，可以由指數型基金，美股如（VOO)，港股如盈富（2800）開始，同時要小注分注，喺一個自己可以承受的損失範圍先好投資。
另外，你要溫翻書，睇翻上堂架Notes等自己有概念，同埋增加信心，相信會對你行出第一步有幫助。
==================================
龔成老師簡介
‧ 暢銷書《股票勝經》、《選股勝經》、《年報勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》作者
‧ 理財真人Show 節目擔任致富教練
‧ 曾接受港澳多個傳媒訪問
‧ 過往於銀行從事投資相關工作多年
‧ 曾在萬多元月薪狀態下，憑股票累積數百萬財富
‧ 現為全職投資者，擁過千萬財富
‧ 於網上分享投資心得，瀏覽量過百萬，為人氣博客，解答網友理財問題逾20,000條
‧ 專欄作家
‧ 擁財務學學士學位
‧ 股票課程導師，香港及澳門學生人數逾4,000人
‧ 過往10年投資成績，過半能獲利超過1倍以上
Facebook 專頁「龔成」粉絲人數超過200,000人
（https://www.facebook.com/80shing）
==================================
Text by BusinessFocus Editorial
免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。