鄭俊弘演《法證》橫跨16年 被封「祖先」 今輯悲慘收場

無綫《法證先鋒》系列一直是觀眾心中經典，由2006年播出《法證先鋒1》到近日熱播的《法證先鋒5》，做足16年都仍然有話題。日前《法證先鋒5》一眾主角包括黃宗澤、袁偉豪、蔡思貝及鄭俊弘等人就齊齊出席記招，當中原來鄭俊弘由第一輯開始已經演出，唯獨第三輯冇佢份，搞到洪永城都用「祖先」來形容佢！可惜鄭俊弘為劇集「獻身」多年只是由技術員升職做鑑證主任，對白冇增加，最後仲會悲劇收場，認真陰功。

第一輯（2006年）

鄭俊弘於2006年已經演出第一輯《法證先鋒》，當年只有23歲的他青靚白淨，飾演蒙嘉慧細佬梁小剛及法證技術員，以第一次演出來說出鏡率及對白都算多，起碼屋企及公司戲碼都見到他的身影。

第二輯（2008年）

去到第二輯鄭俊弘繼續飾演梁小剛，繼續都係做法證部技術員，做歐陽震華的下屬，職級上沒有任何改變，只是多了「歐陽震華舅仔」的身分。

第四輯（2020年）

第三輯鄭俊弘沒有出現，直到2020年再度歸來演出《法證先鋒4》，角色名改為湛霆，仲升級做科學鑑證主任，兼有朱晨麗做女友，事業愛情兩得意，不過對白量及出鏡率都沒有出入，沒增沒減。

第五輯（2022年）

到最新一輯「湛霆」繼續有得留低，飾演黃宗澤下屬兼徒弟，可惜據知去到第七集劇情就講鄭俊弘因為一次鑑證失誤而被黃宗澤教訓，最後自覺委屈而食安眠藥自殺身亡。