一舞傾城｜向出軌渣男提分手被摑網民睇得肉緊 蔡潔無懼愛情挫折勇敢愛

無綫劇集《一舞傾城》昨晚（26 日）播出一集，劇情講到「姑爺仔」Dave（何 浩文飾）氹掂Monica（蔡潔飾）打本做生意，可是Monica無意中發現Dave出軌偷食，令她大感心痛。

自覺癡心錯付的Monica向Dave攤牌講分手，Dave竟無恥地反斥Monica做陪瞓：「我一直都當你老婆，直到你做雞！」Monica 聞言心死地說：「係呀，我做雞都係因為你呀！我班姊妹話我唔值得咁做，因為你係姑爺仔！」Dave惱羞成怒，怒摑Monica，暗戀Monica的志飛（楊明飾）見狀即痛毆Dave。Monica終於與渣男Dave分手，不少網友開香檳叫好。蔡潔笑言有留意到網友戥Monica唔抵，她說：「見到有網友每日都問一次幾時分手，覺得好好笑，大家都睇得好肉緊。」提到網友覺得她癡心錯付，蔡潔解釋：「其實 Monica唔係白癡冇腦，每個戀愛中嘅女人都係盲目，只不過佢係好盲目咁解，佢同呢個男仔3年都知道佢咩人，只係佢選擇相信呢個人會改，只不過呢個男仔比較自私，但佢唔係唔愛呢個女仔。」

蔡潔透露和何浩文事前有商討如何演繹這段關係，她說：「唔想呢段關係好公式化，一個傻妹遇上渣男，而係想展現到俾觀眾睇，點解呢個女仔咁盲目去相信呢個男人，佢哋兩個嘅感情唔係假嘅，其實女朋友下海，個男仔都會傷心。」她很開心角色能夠獲得同情。

提到有網友擔心Monica會黑化，蔡潔聞言意有所指：「睇吓大家點定義黑化，劇集後半段會有啲事情發生喺Monica身上，佢會有啲嘢改變。」問到現實中的她是否戀愛腦？蔡潔笑言：「有一句說話『智者不入愛河』，大概係話如果想保持理智就唔好戀愛，但愛情係人生中好重要嘅嘢，當愛情來到就好似一場賭博，要跳入呢條河需要好大勇氣。依家嘅我會覺得要用理智嘅心情去睇每一樣嘢，包括愛情；如果愛情真係嚟到，我覺得我依然會好似年輕時咁樣，有跳入呢條河嘅勇氣。」