相信有嬰兒的家庭，一個月都用不少尿片，尿片價格亦成為一大負擔，有網店看準商機，賣日本尿片，更推出「尿片套票」吸引不少家長光顧。但近日該網店尿片差價突加80%，結果被家長狂轟，更爆出老闆曾靠賣「尿片套票」買3層樓。
尿片套票加定額差價
據了解，網店一直有推出「尿片套票」，操作有如期貨，家長可利用一張套票補「定額差價」，約10至20元，換領一包尿片。由於套票定價浮動，遇上之前日圓大跌，一張套票就跌價至60元。若經該網店購買尿片，假設套票以60元購買，連20蚊差價，即用80元就可買得一包尿片，相較坊間近六折的優惠，以1個月4包計算，每個月節省不少。
但近日公司公布部份尿片加「差價」，然而是每包最多加8元，加幅最多近8成，令不少家長手足無措。
家長狂轟 更開設千人群組
不少家長在社交網站狂轟網店，「本身9x買入，好辛苦買左堆8x7x6x 溝淡，點知最後輸係差價度」、「而家加$8 對其他人講未必大數目 但一次訂4包 以前$80 而家要$112⋯真係差好遠喎」、「點解可以咁樣玩，感覺踩中左陷阱咁」、「唔好因為一句平過出面而ok焗住加價，而且加價都應該早少少通知」、「買套票嘅時候寫到明想換唔同片加幾多錢㗎喎！點可以隨便改嫁！」、「套票平埋都唔夠你補差價既加幅。。。感覺被騙了」。
網店老闆反鬧客人
網店老闆對於客戶不滿，不單未有作安撫，反而第一時間反鬧客人。老闆表示，「喂… 想點， 一早講咗有加有減㗎喇… 套票減返俾大家又唔滿意，套票加價又話加得勁…唔使攪咁多野喇，就玩爛個遊戲佢啦，唔計喇， 一律再加…我又想睇吓邊到買片平得過我…腦細字。」
隨後又發文指，「我已經一早講咗差價會加會減，真心唔明嘈咩鬼… 今獲真係慶，就算我加咗差價都唔係話平過出面一兩蚊咁少，而係仲有10幾蚊或以上。過年後咩都加晒， 成本貴晒，又咁多年無加過價，加多少少就鬼殺咁嘈…咁唔小下出面賣緊$125以上個班人？？？？？？再者…特選客戶我都依然有做平套票俾你哋…係未先？我做事不嬲光明磊落… 日本都賣緊哩個價，嚟香港唔使運費，同事唔使出糧，送貨唔使錢做義工？？？」
家長不滿紛紛要求退款回水
對於老闆反鬧客人的態度，一眾家長非常震怒，紛紛要求退錢回水，因套票條款說明可以退款，一時間不少用戶提出向公司退款要求，現時於Telegram的苦主群組已經逾1,600人。
老闆終「跪低」 客戶賣帳？
面對群情洶湧，原來擺出一副高高在上姿態的網店老闆，態度亦轉趨溫和，亦在社交網站表示，「諗住出個post俾大家笑吓」；「明白大家嘅感受，我亦都唔想大家唔開心。亦都唔想有人再喺依件事上借題發揮」
及後老闆又提出回贈計劃，企圖嘗試安撫客戶，不過暫時為止，苦主群組的家長仍然未收貨，亦有部分堅持退款。
老闆曾靠賣「尿片套票」買3層樓？
翻查該網店的社交網站貼文，公司從2021年開始，已利用公司流動現金，以全款買樓收租，共有三層物業，分別位於屯門置樂及恒大珺瓏灣，而根據帖文日期，另一物業應為元朗的#LYOS。
部分網民回應：
- 犀利，拉攏埋新客一齊鬧舊客，話好平嘅新客們，係呀你買係好平呀，因為腦細加價係加落舊客度丫嘛
- 閒言閒語腦細你大人有大量唔駛理丫，把口生喺人度，做好自己就得啦，你同同事們處理好啲退款未呀？
- 唔明點解腦細成日用個高高在上既語氣對客
- 我比錢儲值，你有cash flow投資，你無賺咩？點解要搞到大家要跪謝你先得？
- 見到一間公司沒落嘅先兆
- 套票買幾平都冇用，第時加番曬落差價到
- 就好似去咗一間好平的餐廳，叫咗好多嘢食，但埋單時先通知你要俾多30%，雖然啲嘢好好味，服務亦好好，但個心會唔舒服
Baby-clan是甚麼網站？
Baby-clan是一站式親子平台，讓爸爸媽媽隨時隨地購買尿片或親子用品，最近便爆出「尿片套票」的公關災難。詳情按此
Baby-clan的「尿片套票」有甚麼公關災難？
Baby-clan將尿片差價突然加價80%，被家長狂轟騙錢，老闆更發文反鬧客人，不少家長都要求退款。詳情按此
Baby-clan的老闆有甚麼爭議？
Baby-clan的老闆不只在FB反鬧客人，更被爆靠賣「尿片套票」買3層樓。詳情按此
原文刊登於 AM730
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)
