曾比特上節目惹嬲嬲「返無綫啦」 粉絲力讚ViuTV夠大量

透過參加《全民造星II》而取得知名度的曾比特，自從去年同參加內地電視台芒果TV與無綫聯合製作的音樂真人節目《聲生不息》後，成功開拓內地市場，狂接廣告、商演及綜藝節目演出，賺人仔賺到笑，不過就換來成為香港網民的攻擊對象。

早前曾比特就回港參演ViuTV綜藝節目《MM730 - 粉絲福利署 》，同一班「爆炸糖」（曾比特粉絲專稱）見面交流又送禮物，非常有心，但節目預告出街後，有大批網民就湧入ViuTV Facebook嘲諷：「上面更多粉絲，更需要關懷啦」、「佢唔係大台台柱黎㗎咩」、「730咪阻人北上發達啦，阻人檔期，搵呢個嘉賓嘅，自己反省下啦！」亦有人直接叫他「返TVB啦」。

不過都有大班粉絲力撐偶像：「有實力又真誠Mike,無論去到邊都值得被愛戴！支持Mike！」、「家陣做香港歌手真艱難，淨係唱好歌係都唔夠，仲要唔准北上。不過真奇怪，古仔、GiGi都有返大陸搵錢，但係大家對佢地又無咩反感」、「搵人仔唔可以返香港做嘢？咁奇㗎，唔夠紅先無人搵啫，明星就係周圍發展㗎啦」有粉絲亦大讚ViuTV心胸廣闊，希望《Chill Club》可以邀請曾比特作客。