雯雯澄清同張致恒未正式分開　被出價50萬包養︰生完3個都咁睇得起我？

張致恒（Steven）同老婆區燕雯（雯雯）的婚姻狀態一直成「瞇」，之前Steven爆出背妻偷食兼債主臨門，雯雯曾先後在社交平台表達不滿，又曾暗示想離婚，不過最後兩公婆又「床頭打交床尾和」，一家五口繼續過生活。

不過去到上個月，雯雯又突然在社交平台爆金句「做人窮唔緊要，但如果做人唔爭氣，樣樣嘢都仲要懶，咁就係廢」，去到日前又踢爆Steven負債累累，表明沒錢還，更直言就算老公出軌都不會對自己生活或情緒造成影響，明顯已經「半放棄」Steven。

到昨日（13日）雯雯在IG同網民玩「你問我答」，透露屋企已經沒聘請工人姐姐，要親自打工搵錢養家，更有意畀大仔入行做童星。有網民又直接問她「為何分開多次最終也跟Steven在一起」時，雯雯澄清：「由頭到尾都未正式分開，我一直都係話單方面計劃緊，但係計劃之中，一定要係對小朋友最好先能夠實行，所有嘢我都安排緊計劃緊。一個家庭有小朋友唔係自己想點，就可以即刻實行到。依家每日大家都好努力，做好爸爸媽媽呢個角色。」

更有網民對Steven的性能力感興趣，問雯雯：「Steven性感力好強？」雯雯就用哥基愛太做背景圖片及回覆：「你對佢咁有興趣，你應該係去佢Instagram。」當中更有人揚高出50萬包養雯雯一個月，但要簽保密協議，雯雯笑言：「生完3個都咁睇得起我」。