《祥賭必贏》作為我今年第一套睇嘅賀歲片，完全無令我失望。如果想趁放假輕鬆入場睇下戲，依套會係唔錯嘅選擇！
（以下有劇透）
故事以一個賭字同一對男女開始，繼而發展角色間嘅關係，充滿有趣搞笑元素，亦加入唔少新年色彩同致敬港產片嘅情節，相當豐富，我係睇得開心又舒服。
廣告（請繼續閱讀本文）
電影胡鬧中亦帶出一點溫暖，發生咩事最重要有身邊人支持，與其將問題收收埋埋，獨自承受，倒不如鼓起勇氣同親人坦白，佢地定會為你遮風擋雨，依個就係親情同愛情之珍貴。後段仲用咗《洗面》做插曲，配合佢地嘅經歷，非常感動。
而要數到電影最精彩嘅部分一定係演員表現，角色間火花十足，帶出一幕幕精彩演出。朱康同張繼聰一如既往係搞笑擔當，每次出場一定笑聲不斷，佢地同時鬥嘴個段更睇到我拍案叫絕；做喜劇嘅阿Sa係有種魅力，又靚又型仲自帶幽默，非常吸引。
Stanley終於喺電影有比較多戲份，佢亦不負所望，兼備搞笑認真；Kayan9896就令人驚喜，同拍YouTube個陣嘅感覺相當唔同。
廣告（請繼續閱讀本文）
然而，《祥賭必贏》確實有不足嘅地方。整個劇本相對普通，幾易估到劇情走向，有啲位去得太快，又有唔太合情理嘅橋段，角色塑造亦唔夠立體，主要靠演員演技支撐。不過，睇賀歲片無非都係想一家人喺戲院笑一餐，咁依部戲的確做到，絕對稱得上係一套合格以上嘅電影。
最後，趁依個機會祝大家蛇年一帆風順、心想事成、開開心心，最緊要係睇多啲港產片！
▼Follow hkpopculturelover
Instagram: https://www.instagram.com/hkpopculturelover/
廣告（請繼續閱讀本文）