「楊志成」…..霎時間你未必 load 到係乜水，呢個名似小學同學又似表姨婆個仔又似唔知邊區嘅區議員，但「戰神」呢個朵，跑界山界肯定無人不識，但如果真係無聽過的話，sor9ly，閣下可能上個月先開始行山跑步。Anyway，無錯，「楊志成」就係「戰神」。
至於「戰神」呢個朵點嚟嘅呢，眾說紛紜，但其實唔重要，令人印象深刻嘅係佢呢幾年默默地建立起一個「不留餘地，全身投入向目標鍊到盡」嘅真男人型像。個子唔算高大，火柴人嘅身軀10號風球出街極可能被吹至大灣區，肌膚黝黑程度隨時超越非洲土著，但雙眼永遠有火，話題一扯到跑步跑山更加一發不可收拾!
繼2022年完成四徑，去年初與本地3名頂尖越野跑手組隊以11小時38分取得毅行者總冠軍，並打破香港華人紀錄，佢嘅威水史可能寫幾期都未寫完，但同樣唔重要，戰神經常強調「跑品」凌駕於所有成績及殊榮，做人緊要過做時間。Peter經常話 :「有咩教練就有咩學生，就會形成咩嘅跑會。」嚟到「戰神」嘅跑班「戰神越野」，即管見識吓係咪真係咁神咁高尚。
「戰神越野」- 一個路跑山跑兼備嘅跑班，除咗戰神，其賢內助 Cherry (車厘子)同是高階跑手，夫唱婦隨，順理成章擔當助教之一。唔少學員均慕名而至，看似不苟言笑嘅戰神原來平易近人兼超級謙虛有禮，貴為本地跑壇星級猛將，沒絲毫架子與光環，說話甚至帶點羞澀。本以為佢嘅跑班屬氣氛嚴肅目標為本嗰隻，點知同學們皆有講有笑，炒媽拆蟹，中學生一般的低能但好笑。
難忘嘅係，正當各披醒組別按當晚 program 各自衝圈之時，似乎唔跑唔舒服嘅戰神竟由頭到尾跟足所有學員衝圈，呢刻引領A組衝緊3分尾，下一分鐘見佢伴隨B組跑緊5分頭，眨眼又見佢陪著6分頭嘅C組同學，已經跑到扯晒蝦講唔到嘢嘅你，佢就邊跑邊講書邊執跑姿 (心諗 : 得㗎喇，知㗎喇，你陪第二個跑啦)。仍記得當晚一個讓人感動嘅畫面 – 當所有組別完成 program 在休息等放學之時，戰神仍陪著一個新加入兼初入跑坑嘅學員一齊「慢跑」至完成，如此一個親民貼地嘅教練怎不叫人動容？你會唔好意思跳船，連偷雞抖耐少少都覺唔好意思，眾人對戰神嘅敬佩似乎均發自內心。
大膽一句，要進步要成功從來無咩獨門秘技家傳絕學，google 一吓「如何成為sub 3 跑手」，浩翰嘅網上資訊相信10日10夜都睇唔晒。同樣，即使被封戰神，所傳授嘅亦非甚麼奇門遁甲只此一家。一直認為，戰神之所以如此令眾多跑友山友敬重，絕非單憑佢有幾勁幾叻幾快。作為一個業餘跑者嘅佢，絕對深明打工仔下班後嗰種勞累，嗰份唔願郁嘅倦怠，同為上班族嘅我哋從旁睇，會驚訝於戰神仍能將身心全程奉獻於練習與教班，工餘時間為著比賽仍通宵達旦嘅操練，幾乎年終無休嘅恆常訓練，每逢比賽必充滿濃濃戰意嘅狀態，自問無能力練到戰神般嘅水平，但嗰份「無嘢可以令我停低」嘅堅忍不拔，絕對值得終身學習。
The post 尋找跑會的故事 #22 | 戰神越野．沒有光環的神 appeared first on Fitz 運動平台.