楊千嬅為20磅肥肉擺阿仔上枱 個唱宣佈取消唔使修身

心口掛住個「勇」字的楊千嬅，被指冒住疫情及輿論壓力下於今個月底舉行紅館25周年跨年演唱會，雖然個唱門票滯銷，但楊千嬅為作最後衝刺，仍四出努力做宣傳，不過最新消息是六場個唱已鐵定取消。日前楊千嬅接受無綫娛樂新聞台節目《StarTalk》主播許文軒訪問，講到個唱前的準備功夫時，楊千嬅以疫下生活大亂為理由，解釋身形突變肥廿磅之謎，仲話囝囝Torres要求佢下廚，老公丁子高又冇微言，所以先煮大咗幾個size，自己好食懶做運動竟然擺個仔上枱，依家唔使開騷唔使修身喇！

撰文：東方新地 圖片：楊千嬅IG、電視訪問截圖

楊千嬅個唱以安全行先

楊千嬅將於12月底舉行紅館25周年跨年演唱會，近期爆發第四波疫情，個唱未知能否如期舉行，不過宣傳仍要照做。楊千嬅現身無綫娛樂新聞台節目《StarTalk》時透露，今次演唱會跟之前巡唱不同，是全新用劇場形式表達她這25年的演藝生涯，她透露演唱會戰戰兢兢走到現在，有好多健康、安全問題要兼顧，但抱着積極心態，發生什麼事都好，會以安全行先。訪問播出後，楊千嬅個唱已宣布取消，退票安排稍後才公布。

楊千嬅肥得有道理

談到個唱前需要做的準備，對楊千嬅來說最重要應該是減肥，年中她已被本刊記者影到素顏出巡巨躉再現，肥肉橫生，早前為無綫台慶獻唱，又被指上鏡肥腫難分，提到過去一年疫情令她的生活習慣有所改變，她指疫情下已休息一年，因不習慣停工多時，壓力大搞到不停食，將工作的幹勁轉移到食方面，由度Rundown變成設計菜譜。楊千嬅更大爆自己重了20磅，有日發現件睡衣窄窄地，才驚覺好大鑊。

楊千嬅肥到被誤以為陀B

楊千嬅最初發現自己膨脹，仍未有減磅意識，她說：「我照鏡見到好唔對路，啲人仲以為我有咗。丁生雖然冇乜微言，但係都feel到佢覺得唔好再食喇！但係好奇怪，之後又繼續煮同食，個仔要叫我煮喎！好喇終於煮出個大頭佛，煮大咗幾個size。到咗6月，丁生終於問我仲想唔想做個騷？我知道要減啦！」其實身為樂壇天后開個唱應該係以歌為主，身材只係其次，如果唱live唔夠氣又走音，不如花多啲時間練歌仲好啦！不過個唱最終因疫情取消，楊千嬅又可以繼續大吃大喝喇！