綠葉經典嘅一片天！連曾志偉都係排第5，你又認得幾多個？

配角嘅存在唔止係襯托主角，唔少配角先至係經典

一個故事除咗主角，仲要有無數個配角來襯托劇情。香港影視發展咁多年，創造咗唔少經典角色，當中唔止係主角，連綠葉都一樣咁出彩，被稱為「香港影圈四大惡人」嘅何家駒（家駒哥）、黃光亮（傻標）、李兆基（基哥）、成奎安（大傻）裡面都係以演出反派聞名嘅配角。如今四大惡人裡面有三個都已經去世，留下嘅就喺電影裡面經典嘅演出。DailyView就用網路大數據整理咗現今演藝圈裡嘅綠葉代表，連埋佢地嘅相關成名作做咗以下排行榜，一齊來睇下你又認得幾多個配角演員！

DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。

10 家英哥 羅家英

要數經典綠葉不能不提星爺電影嘅御用配角，家英哥一定係第一把交椅。家英哥本身唱粵劇出身，喺演出周星馳電影後以搞笑配角走紅，令人印象深刻一定係《國產凌凌漆》嘅達聞西同埋囉嗦嘅唐三藏。雖然家英哥以喜劇裡面嘅誇張角色為人所知，但早係1995年家英國就憑住同芳芳姐合作嘅《女人四十》，獲得金像獎最佳男配角，係又唱得又演得嘅早期代表人物。  

image source:bilibili

9 達叔 吳孟達

同樣係星爺嘅御用配角，達叔傻傻更更同佢粗獷嘅外表成強烈對比，喺電影中嘅角色大多數都係屬於「犧牲小我」來襯托主角嘅屬性。雖然達叔都演過唔少其他影星主演嘅電影，就好似攞埋金像獎最佳男配角嘅《天若有情》，就係同劉德華合作。不過達叔最為人所知嘅演出，都係拍住星爺演出，好似《整蠱專家》、《食神》等等嘅電影真係算得上標誌性演出。

image source:Youtube/TBB 高清電影

8 包租婆 元秋

繼續數星爺電影嘅御用綠葉，捲住成把頭髮又咬住一條煙，直頭係其中一個家傳戶曉嘅電影經典人物—包租婆，就係由元秋出演。其實元秋本身無參與《功夫》嘅試鏡，不過喺佢陪同師弟師妹參與試鏡嘅時候，咬住條煙喺旁邊睇住，就係咁被選中做最經典嘅女配角。為咗達到肥婆嘅角色設定，仲兩個月內增肥14公斤，非常敬業，一舉拿下金馬獎最佳女配角，可以話實至名歸。

image source:Youtube/Plumcake梅餅

7 苑仔 苑瓊丹

有不計形象來演出喜劇嘅，仲有苑仔苑瓊丹。同樣喺演出星爺電影演出一條綠葉路，苑仔喺咁多女演員中，最帶來新鮮感嘅一定喺醜出一片天。本著佢嘅一個演出原則—扮醜就要徹底，喺《唐伯虎點秋香》、《九品芝麻官》等，多數都演出形象誇張嘅龜婆，對白又粗鄙直接，以女演員來講都真係幾無底線，就係咁樣先令苑仔夠深入民心。

image source:Youtube/起司Cheese

6 黑仔 姜皓文

黑仔由亞視出身，係第一屆亞視電視先生選舉嘅亞軍，雖然當時知名度唔高，不過撈開電視汁嘅觀眾唔多唔少都有印象。而黑仔比較為人所知都係由電影開始，拍住各式影帝做配角，一啲都唔輸蝕。喺《奪命金》裡面飾演同劉青雲拍住上嘅凸眼龍，喺《樹大招風》裡面拍住任賢齊、林家棟同陳小春，黑仔依然憑住呢套戲獲金像獎最佳男配角提名，實力相當強勁啊！

image source:Youtube/TVB (official)

5 獎門人 曾志偉

曾志偉喺香港娛樂圈資歷同埋貢獻深厚，曾經仲要係大台嘅「鎮台之寶」。要數志偉哥演出嘅作品實在太多，不過唔好因為佢喺電視面前做獎門人嘻嘻哈哈，就唔記得佢係電影中出彩嘅配角演出。尤其擔任反派黑社會大老嘅角色，由《甜蜜蜜》嘅歐陽豹到《無間道》嘅韓琛，志偉哥唔使企起身，用眼神就可以將個種陰濕嘅神髓演出來，簡直令人無法忽視佢嘅存在。

image source:youtube/疯狂影视剪辑

4 烏鴉 張耀揚

令人印象深刻嘅配角，點可以無反派嘅存在。古惑仔系列捧紅咗鄭伊健、陳小春等人，當然唔少得戲裡面嘅反派。烏鴉張耀揚就係其中一位，模特兒出身嘅張耀揚憑著高大嘅身形，再加上異常霸氣嘅冷酷眼神，喺飾演烏鴉之後亦繼續演出反派，係《鎗火》同《無間道II》都有令人深刻嘅演出，可惜之後就淡出影視圈，令人扼腕再無咁霸氣嘅反派。

image source:youtube/香港爆笑影片

3 嘉樂仔 錢嘉樂

嘉樂仔比較為人熟悉嘅，可能係喺獎門人旁邊做效果嘅獎老時期，表演細胞完全表露無遺，但係其實錢嘉樂先後以配角出演過唔少電影，除咗演過古惑仔嘅大頭仔，其實早喺1995年同華仔合作嘅《烈火戰車》就入圍過金像獎最佳男配角，嘉樂本身係動作指導又係業餘賽車手，技術含量本來就高，不過感動人心嘅都係充滿義氣嘅演技。

image source:微博/錢嘉樂KaLok

2 Laughing Gor 謝天華

《古惑仔》裡面嘅跟班大天二，令謝天華開始有咗知名度。隨後謝天華重回大台，謝天華算得上有觀眾緣，雖然唔係標準男主角相，不過勝在夠喜感，由《皆大歡喜》嘅金月到《鐵嘴銀牙》嘅方唐鏡，出街都會被人認得下咁。不過講到真係事業第二春，就一定喺《學警狙擊》嘅Laughing哥一角，紅到唔止拍電影版續集，仲攞埋萬千星輝最佳男配角。

image source:Facebook/Pattern

1 智叔 廖啟智

呢位真係金像獎認證嘅最佳男配角，對於睇電視大嘅觀眾一定唔陌生，尤其大台最熱門嘅警匪片題材，智叔真係由散仔演到警方管理級人馬。智叔係螢幕面前好似變色龍咁，慈祥又得、狡猾又得，無對白嘅時候係連條眉都有戲。截至目前，智叔總共被提名九次金像獎最佳男配角，憑住《籠民》同《證人》獲獎二次，連網友都形容實在係影帝級綠葉。

image source:Facebook/TVB

配角也許默默無聞，不過佢地都係電影中不可缺少嘅角色

演藝圈雖然喺睇樣嘅世界，好多時候一部電視劇集、一部戲只會捧紅一兩個主角。不過一眾就算無男、女主角相嘅演員，依然默默付出演好每一個角色，有好多綠葉演員耕耘十幾年，行出街就算被人認得，都叫唔出名，都唔可以話唔尷尬。所以大家有欣賞嘅演員就要好好記住人地個名，有機會就多啲表揚下佢地啦！

image source:《KEYPO大數據關鍵引擎》

分析說明：

本研究資料由《KEYPO大數據關鍵引擎》提供，分析時間範圍為2019年06月20日至2019年06月21日。

網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『香港電影經典綠葉』相關文本進行分析，並根據網友就該議題之討論，作為本分析依據。

本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。