廣告（請繼續閱讀本文）
廣告（請繼續閱讀本文）
洪永城（Tony）最近人氣好旺，播完《多功能老婆》後，主演的《丫鬟大聯盟》和《黃金有罪》疊住推出成為「劇王」，而跟黃翠如合作主持的《出走澳洲》成為台慶頒獎禮「最佳非戲劇」五大節目之一。Tony在新劇《黃金有罪》中突破咗唔少第一次，包括畀車追、畀人打、碌落山、跳埋樓，仲要除衫做戲，好激。採訪：方騫平 服裝：Tommy Hilfiger
新劇《黃金有罪》中的洪永城係個70年代街頭長大嘅小混混，他就趁經濟起飛，偷呃拐騙賺錢，同陳瀅齊齊夾計搵食，好啱Key：「套劇有好多動作場面，因為我旁門左道，畀人追、畀車追、碌落山、跳落樓，都畀我包辦晒，經此一役功夫好咗，相信將來可以拍吓功夫片。」多動作場面又無用替身，所以Tony經常都有損傷，甚至整親肋骨。「有場戲畀林韋辰手下打，可能位置夾得唔夠準，武指一拳就打中咗我個嘴，搞到「爆缸」流血，好彩冇傷到牙齒，不過嗰個take好ok，因為變咗真打。」
拍親熱戲無感覺
講到印象最深劇情， Tony興奮說：「有場戲由三樓跳落二樓，再接住陳瀅碌落地下，由於要保護住佢，驚整親佢唔好意思，所以碌落地時都好埋身。仲有同陳瀅、李璧琦、陳自瑤有咀嘴戲同牀戲，搞到啲男同事都好羨慕咁問我：『係咪畀錢買通咗監製同導演？』不過我又冇乜特別感覺，都係演戲啫。」提到再奪主持獎項，問到下個目標是否向視帝進發？他即說：「距離視帝之路仲有好遠同好遠，眼中視帝除咗識演戲，都要同幕後有溝通，以及可以處理到場面嘢，呢方面仲有好多嘢要學。」