【搵食CONY】一站式韓國食品專門店　買勻醬菜、凍肉兼便當

一場疫症改變咗好多人嘅生活及飲食習慣，而在韓國街屹立逾20年嘅「新世界韓國食品公司」，上星期就喺旺角開設咗一間一站式嘅韓國食品專門店，集齊旗下3個品牌，提供韓式小菜、凍肉及便當。無論你係抗疫廚神定手殘人士，想儲糧、自煮定買外賣都一應俱全，新店仲有一系列開幕優惠。CONY去咗趁墟之時仲順手捉埋品牌嘅韓籍經理Paul傾兩句，為大家精選各種特色產品！

據知新店佔地超過2,700呎，集合3大品牌，分別是專售韓國伴菜的「BANCHAN」、提供便當、熟食的「O'taste」，以及主打韓式凍肉的「Chef & Taste」。由於品牌希望為顧客提供最新鮮的產品，因此店內有不少空間被劃分為工場及廚房之用，不但便當即叫即煮，連醃肉、醬菜、伴菜等都在店內的工場每天新鮮製作。

「旺角店的概念是 『一站式』，不但將公司所有品牌都聚集一起，仲加上中央廚房概念，希望能為顧客提供最新鮮嘅產品。」不過呢個設計真係「有辣有唔辣」，雖然保證到產品質素，但購物空間會相對減少，顧客好多時都要來去匆匆。「我哋都收到唔少意見話店面空間不足，其實係估唔到大家嘅反應咁好，希望遲啲有機會再開更大間分店！」

韓國直送與自家醃製泡菜

韓國人唔會餐餐「開火」，而「BANCHAN」則提供逾50款韓國伴菜，當中大部分產品係韓國直送，如明太子魚春、原味泡菜、生醃八爪魚、生醃魷魚、生醃蠔等海鮮類伴菜。另外亦有部分係自家廚房每日新鮮醃製，如招牌辣泡菜，「辣泡菜和原味泡菜唔同，辣泡菜不經發酵，口感會更新鮮，更爽口，亦可食到泡菜汁的原始味道，而原味泡菜則因為經過發酵而味道較酸。」

特色韓風醃肉

除咗打邊爐，近日亦有唔少人都嘗試在家燒肉，而「Chef & Taste」就集齊多款「韓式凍肉」。即係點？原來韓國人處理凍肉嘅刀工及醃製都有獨特方法，「韓國人處理牛排骨時會沿住骨頭的方向來切成一條長薄片；又會將已經切割好嘅五花肉上再𠝹出好似蜂巢般嘅花紋等。至於韓式烤肉嘅醃製特色除咗會用韓式辣醬等調味料，另一個重點係『多汁』，因此烤煮嘅時候，醬汁會繼續滲透到肉入面。」

超齊全韓式美食

除咗韓式食材，自問你好似CONY咁手殘嘅朋友，仲可以去「O'taste」買多款韓式料理返屋企慢慢嘆。雖然店面細小，但就提供超過100款美食，當中包括便當、拌飯、飯捲、煎餅、炒年糕等，有唔少都係即叫即做，而且品牌仲會每季研發及增添新菜單，保持客人嘅新鮮感。

新世界韓國食品公司「一站式韓國食品專門店」
地址：旺角洗衣街85號
營業時間：周一至六早上11時至晚上9時半（逢周日休息）
電話： 2133 5651 / 2133 5652