以前對颱風嘅印象都會停留喺打麻將、有得放假，但係經歷過今次「山竹」吹襲之後，相信大家以後對颱風都唔會再掉以輕心，更加唔會想再打風！「山竹」係近十幾年來吹襲香港嘅最強颱風，對香港造成唔同程度嘅破壞，即使留喺室內、屋企亦都唔代表安全！唔少藝人嘅屋企都受到破壞，佢哋亦有喺社交網站分享屋企嘅慘況，令大家都紛紛覺得「最安全嘅地方，竟然有機會係最危險嘅地方」？
經歷「山竹」嘅蹂躪後，香港多處爆破璃、樹木倒塌、水浸等等！藝人們同我哋一樣，雖然留喺屋企入面，但屋企亦都受到唔同程度嘅破壞！李治廷喺Instagram上面拍片分享自己屋企嘅情況，形容呢個風唔係普通嘅風咁簡單，之後佢見到啲風吹得好厲利，吹到玻璃門嘅門檻都跌落嚟，令到佢都要企喺窗前頂住個窗！
喺呢段片入面，佢形容呢個情況直頭係「歲月神偷Style」，仲要配合文字：「撐住啊香港 做人最近（緊）要保住個頂」，令大家都不禁諗起佢出演嘅《歲月神偷》～
劇中有一幕講到60年代香港被超級颱風「溫黛」吹襲，任達華、吳君如一家拼命死守家園，仲講出劇中名句：「做人最緊要保住個頂！」估唔到10年前嘅電影橋段會喺現實中重現！
藝人衛詩雅（Michelle）更加因為今次颱風而有血光之災！Michelle喺打風期間已經留喺屋企，但點都估唔到屋企有3塊石屎跌落嚟，仲要擊中佢嘅右臂！Michelle形容今次「以為自己拍緊災難片」、「成手血加不斷尖叫」，好彩今次只係揼中手臂而唔係頭部咋！
龔嘉欣（Katy）嘅屋企窗台水浸，浸到湧入客廳！佢喺Instagram度表示：「屋企失守啦 向東南 完全食正風 由10點到而家 5個幾鐘 終於暫時止住水浸 一起身見到 客廳全部都係水 真係徬徨到一個點」不過好彩有熱心鄰居嘅幫忙，先令到Katy冇事（所以話有個好鄰居係幾咁重要呢～）
而阿SA屋企露台嘅盆栽亦都吹到跌哂，佢拍攝嘅短片仲可以聽到啲風「呼呼聲」、隻窗又被吹到「呯呯聲」！不過見到佢隻窗貼住嗰兩條膠紙，唔少網民都笑稱：「你果兩條膠紙，唔貼好過」～
雖然經過今次「山竹」可能會造成財物損失，但好彩今次颱風冇造成人命傷亡，大家都安全就夠啦！
Text：Girls Editorial
Photo Source：Instagram