馬國明、胡鴻鈞拍拖行街 粉絲合照只限視帝

馬國明這位大台筍盤，和黃心穎分手後，近日亦和唐詩穎的名字被拉在一起。不過似乎這筍盤不只受異性歡迎，男仔都一樣得。昨日胡鴻鈞就在Instagram上載二人合照，當中胡鴻鈞戴口罩又太陽眼鏡，基本上沒可能認出，而亦因為這樣，他分享了一個和馬明在街上遇上粉絲的故事。之後馬明在早前才開設的微博中亦有分享，留言：「猜猜他是誰……估中冇獎……」

至於胡鴻鈞要分享的故事就是：「話說今日同小馬朝早一齊開工，收工之後就梗係一齊拍下拖食個飯行下街睇下車啦，唔知係咪因為我今日個造型嘅關係，沿路有好多鄉親父老同我打招呼，就連駛過嘅貨車師傅都同我揮手微笑，突然之間心頭一暖，然後有一種好強烈嘅感覺：『入行咁耐，我終於覺得自己係明星啦！』正當我沾沾自喜心感欣慰，心諗原來星味真係點擋都擋唔住嘅時候……『嘩！馬國明呀！』『馬明你好靚仔呀！』『我好鍾意睇你做戲架馬明！』之後有人拍一拍我膊頭，我心頭再次一暖，好彩原來都有人認得我，『唔該，可唔可以幫我同視帝影張相呀？』今日嘅經歷話俾我知，做人千其唔好自視過高，同埋唔好以為戴副超笠頂帽戴個口罩就係明星啦喂。 (溫馨小提示: 抗疫期間戴眼鏡同口罩都可以有效減低感染病菌嘅機會率) #起歌 #沒身份妒忌 #如何完美示範狐假虎威 #胡假馬威 #星味未輪到你呀老胡 #腥味就有 #俾心機做野啦 #加油呀」