Nowhere Boys最近驚喜地推出情歌作品《兩秒》，用一首歌時間帶大家進入一場浪漫邂逅。
「我在 兩秒之內 眼界之外 發覺你所在」
歌詞營造得好有畫面，一個對望，兩秒鐘時間足已墮入愛河。即使有千萬人在旁，眼中仍然只有對方，視線無法遠離，世界彷彿靜止，時間不再流動。心中湧出無數想法同感受，好似從未有過如此心動感覺，一段戀情從此展開，再也不分離。
一生中能碰到既人數之不盡，能夠遇上一個讓你一見鍾情，願意放棄所有去追尋既對象實在十分難得，要加倍珍惜，更要好好記住相遇一剎。
「力竭地停留在這一剎那無視四周變化 越遠越朦朧未阻止世界在我眼中美化」
一段關係既開始往往相當簡單同毫無預兆，即使曾經錯過，最終仍會再遇，一瞬間足以改變一生。命中注定你喺依一分依一秒注視到對方，依個就係緣份奧妙之處。好佩服歌詞可以將一個短短相遇寫得如此夢幻。
「以後 有你所在 遠至天外 近至我心內」
MV更特別地用高空角度拍攝，故事中兩位主角曾經擦身而過，及後如常在路上行走，本來無任何交集，人潮亦來來往往，但喺意想不到之際，彼此在茫茫人海中對上眼，一刻動情。觀眾用上帝視覺見證整段相遇，新鮮奇妙，導演Oscar 應記一功！
「殘影長留無論目光轉向仍然望得見你 一次過俘虜我所有目光」
《兩秒》編曲入腦，同主音Van陽剛沉實聲線完美配合，將歌中情感富力量地傳遞入心，展現鐵漢柔情一面，風格亦同其他廣東情歌唔太相似，異常深刻，聽一次我已經超級喜歡。明明係一首甜蜜作，但聽緊個陣又會莫名地感動，只可以話Nowhere Boys既演繹充滿感染力。
「如果 如果 如果 再追不上再沒如果 從心深處每日重播」
Nowhere Boys以往既作品搖滾同玩味比較重，今次雖然題材上係全新嘗試，但意外地適合佢地，仲保留到樂隊特色，希望嚟緊可以再出多啲情歌，依隊高質band絕對值得更多樂迷喜歡。
「想永遠停頓目光接上再也不眨眼」
最後，祝福大家能夠從人海中遇上兩秒令你迷上既人🫶
《兩秒》 Nowhere Boys
作曲：Nowhere Boys
作詞：Fisher Kan
編曲：Nowhere Boys
監製：Nowhere Boys / Adrian Chan
「於茫茫人潮內找到了最美的荒誕
關上了再打開 關上了再打開雙眼
再看多兩眼
殘影長留無論目光轉向仍然望得見你
這剎那 這世界 只有你
只有你
只有你
只有
想永遠停頓目光接上再也不眨眼」
▼Follow hkpopculturelover
Instagram: https://www.instagram.com/hkpopculturelover/