人民銀行繼2月降準後，又再降準0.5個百分點，表示此舉會為市場注入1萬億人民幣。呢個消息對市場當然有啲振奮，始終顯示大陸仍為救市作出努力，但我哋要問嘅係，呢個救市措施有幾大作用？
睇返8月新增貸款大約9,000億人民幣，按年減33.8%，亦低過預期嘅1.2萬億人民幣；貨幣供應方面，8月廣義貨幣供應（M2）按年增長6.3%，略高於預期。狹義貨幣供應（M1）按年跌7.3%，跌幅比7月底擴大0.7個百分點，創有紀錄以來最大跌幅。
喺大陸而言，M1 = 流通中的貨幣+企業活期存款+機關團體部隊存款+農村存款+個人持有的信用卡類存款。M2 ＝ M1+居民儲蓄存款+企業定期存款+外幣存款+信託類存款+其他存款。而家M2增長而M1下降，某程度上顯示流動性高貨幣有流去相對無咁流通嘅貨幣，再加上新增貸款增速下降，可以睇到大陸民眾同公司借錢去做投資動力減低。
降準就係為咗畀銀行有更大借貸空間，可以創造更多貨幣，盤活市場，但當所有人都唔係咁想借錢，加大放貸力度有幾大成效，真係不得而知。現時大陸經濟問題，由樓市債務引發，所以直觀上好多人認為搞掂樓市經濟就會好返，但經濟唔係表面因為乜嘢導致衰退，解決個問題後經濟就一定會復蘇。
而家大陸經濟有三大問題需要解決，一係整體債務問題，唔單單係樓市；二係民眾信心問題；三係整體供需引伸出產業升級問題。整體債務問題，由於過去高速增長，好多公司同民眾都大舉借貸，漠視還款能力，呢個係必須承受之痛，無特別解決捷徑。民眾信心問題，源於佢哋嘅工作同工資穩定程度，如果朝搵唔得晏，或者失業減薪，民眾都唔會願意消費。唔願消費，就會帶出整體供需問題，生產咗啲商品，唔夠人同錢消化，最後又係導致經濟問題。所以大陸必須進行產業升級，提高民眾收入，去吸收產能，亦避免將來因供求失衡導致嘅經濟衰退出現頻率太快。
所以人行話要擴大內需，促進消費投資並重，淘汰落後產能，促進產業升級，支持總供給和總需求在更高水平上實現動態平衡，係切合上文提到三大問題。只係降準能夠解決到幾多問題，只能拭目以待，但都希望大陸經濟能夠真正回暖。喺香港經濟已經押注大陸發展下，真係中國好，香港先有機會好。
金缸經
註：專欄作家言論不代表本網立場
密切留意BossMind動向！立即CLS