70年歷史悦和醬園納收地範圍 盼當局予時間重置廠房

（獨媒報導）屹立於香港過半世紀的悦和醬園，位於古洞北新發展區，廠房料於2024年被收地。醬園第三代傳人龐中衡（Jack）指，搬廠需時5年，但至今仍未獲通知確實的收地日期。他希望政府給足夠時間搬遷，保留「香港製造」的金漆招牌：「搬一間廠最重要嘅係時間，錢我都仲可以問銀行借住先，但時間真係好重要。」

走入古洞石仔嶺，兩邊是矮小的平房、鐵皮屋，滿目是青綠的植物。再往深處走，抬頭便見到五隻紅色大字——「悦和食品廠」。穿過生鏽的閘門，見到師傅正將豉油注入桶內，傳來一陣咸香。佔地三萬呎的廠房每年生產約100萬升豉油、近100萬升醋、70萬升醬料及5萬升米酒。

天台是豉油曬場，放滿用了七、八十年的醬油甕缸。這類甕缸的保温能力高，能將太陽熱力保持到夜晚，幫忙黃豆發酵。

生曬䜴油半年唔落色素

大半世紀以來，悦和醬園堅持用古法釀製豉油。生產一瓶豉油，至少花半年時間。

每早約7時，師傅先蒸煮1,000公斤的黃豆約兩小時，放涼後加入麵粉及米麴菌，放在竹籮上發酵24小時，完成後放在豉油缸內生曬至少半年，直至黃豆被太陽曬至焦糖色，再經歷高温消毒才出廠。

現時有不少工廠會在豉油加入色素，以縮短製作時間。但Jack指出，生曬豉油會較鮮香，別有一番風味，因此堅持傳統的做法：「我哋嘅立場就係有一啲傳統嘅工藝、步驟係好嘅，我哋咪保留囉。」

踏上悦和的天台，便是䜴油曬場，一邊放滿新式的不銹鋼醬油缸，另一邊放滿用了七、八十年的醬油甕缸，部份蓋上了黑色錐型竹蓋，有助透氣之餘，亦防止積水。這些由民國時期延用至今的甕缸是悦和的「寶」，缸身不少修補的痕跡，例如紅色的劃痕正是師傅用來修補裂縫的玻璃膠。Jack指這些甕缸無可取代：「就算我買一個新嘅返嚟，同樣品質，佢都係一個新嘅缸，冇嗰六、七十年嘅味道喺度。」

豉油的顏色來自被太陽曬至焦糖式的黃豆。

當豉油的水份被曬乾，會出現結晶鹽。

為守爺爺一生的心血接手醬園

悦和連繫著龐家的三代人，醬園由Jack的祖父龐堯與佛山同鄉兄弟於1945年來港成立，再到第二代到龐元善及龐元用兩兄弟接手，今日30多歲的Jack已是第三代傳人。

雖然Jack介紹醬園運作時頭頭是道，任何問題都難不到他，但他並非從小被培育成接班人，醬園只是他就讀中學時被爸爸所逼打暑期工的地方。他中學時遠赴加拿大讀書，在大學修讀酒店管理，回港後在連鎖快餐店任職經理數年，不曾想過接手醬園。後來見爺爺及爸爸年紀漸長，但第三代無人有意接手醬園。自幼與爺爺關係親密的Jack因為「情意結」，決定接手打理醬園：「依度行過嘅每一寸地，阿爺都行過」，他希望能守著爺爺一生的心血：「阿爺就啱啱喺疫情前過咗身，嗰陣時我都返咗嚟幾年啦，起碼佢離開之前都知道依度有人幫手，我諗佢都安樂嘅。」

悦和由生產至入樽均在自家廠房完成。

一度覓北區地嘆好彩

要繼續守著爺爺的心血，Jack還得解決搬廠重置的問題。悦和醬園位於古洞北新發展區，部份土地已被收回。今年9月，當局刊憲古洞北新發展區及粉嶺北新發展區餘下地盤平整和基礎設施工程公告，預計2024年會收回悦和醬園的曬場部分。Jack不滿政府的規劃：「佢咁樣收一半曬場，同收晒成間工廠其實冇分別。」

針對受古洞北新發展區影響的業務經營者，政府只會給予賠償，並不會重置。Jack要繼續營運悦和，必須自行尋找合適的土地。他表示覓地重設廠房之路困難重重，首先需尋找可供出售的土地，直言簽租約非理想做法：「如果你簽5年、簽10年，我都唔可以穩定發展，會驚隨時畀人踢走，或者加租。」此外選址又需要符合工業用途，惟大多地勢平坦的土地屬農地或綠化地帶，用途受限。第二是要有基本配套，包括水和電力供應及可讓貨車出入的馬路。

他早在兩三年前已開始覓地，曾向坪輋、打鼓嶺等北區較偏僻的地方打探，惟政府及後又宣布發展「北部都會區」，「好彩我冇提早搬啫，如果唔係我嗰陣時係諗住古洞收，不如再去北區睇吓地啦，去坪輋、打鼓嶺、沙頭角，但宜家成個北部都會區，成個北邊都畀你收晒。」現時，Jack在元朗錦田找到一幅環境合適的土地，不過仍有很多未知之數，例如尚未確定可否興建工廠。他又指所獲得的私人土地資訊有限，望政府可提供合適選址的資訊，讓他更容易找到地方重設廠房。

悦和設有發酵房，用作發酵黃豆。

搬廠約需三至五年

發展局局長甯漢豪上任後表示，會安排地政總署盡早通知受影響的作業者收地安排，讓他們知道遷出日期及提供協助途徑。

不過Jack至今仍未獲通知正式收地日期及賠償等細節，令他難以計劃搬遷：「係咪真係要去到最後一刻先通知我哋呢？甚至乎到今時今日，都未有人同我哋講賠償嘅嘢，但講緊仲有唔夠兩年就要我哋搬，我冇可能吓吓一聽到發展，就企喺度等你去收地。」

搬廠需時，Jack保守估計需要3至5年。他解釋，從覓地到設廠的前期工序，包括進行可行性評估、規劃及設計工廠等已需時兩年。之後再將現址的設備慢慢搬到新工廠，期間生產線不能中斷，否則客人必會流失。他透露，媒體近期報道悦和將被收地後，即有客人詢問他出產情況：「佢打電話嚟問我，『你間廠點啊？你啲貨得唔得？如果你搞唔掂，你提早話畀我哋聽喎』，佢哋都好擔心㗎嘛。」他望政府可給予足夠時間搬遷：「搬一間廠最重要嘅係時間，錢我都仲可以問銀行借住先，但時間真係好重要。」

悦和掛在牆上的牌子用以記錄米酒的每日產量。

做實業嘅人

傳統工業不等於不思進取。悦和第二代將產品的生產過程系統化，獲香港品質保證局頒發「ISO 9001：2015」及「HACCP」認證。Jack亦認為「傳統不等於守舊，創新不可以忘本」，他接手後增設有機產品生產線，包括有機頭抽、有機純米醋等，並獲香港有機資源中心頒發國際IFOAM認可的「有機加工處理認證」，「如果我哋當年冇做依啲認證，宜家仲係一間山寨工廠，真係摺咗佢就算。」

Jack表示悦和雖然是有70多年歷史的傳統產業，但有跟著時代進步：「由我阿爺去到宜家，都一路向上行緊，從來冇向下行。」他亦不認為傳統工業式微：「我哋係有生存嘅價值，我覺得依個城市要健康發展，唔係剩係得投資炒賣，你都需要有一部份係做實業嘅人喺度，去支援住依個社會最日常嘅東西。」

70多歲的老師傅正將䜴油表面的泡沬舀走。

堅持香港製造

八九十年代香港經濟轉型，大量工廠北移至內地，以減低經營成本，但Jack的爺爺龐堯堅持留守香港，既怕奔走兩地難以親自管理，亦望專注服務香港人。

近兩年，香港再次出現移民潮，Jack為甚麼堅持留守？他表示希望承傳爺爺的信念，亦望留住「香港製造」的金漆招牌：「你貼住香港製造四隻字，消費者都會有一定嘅信心。」他指如果將生產線搬到內地，即使品質相同，其他人亦不會光顧：「其他人都覺得你都唔係香港製造，點解我要幫襯你呢？如果你係中國製造嘅，咁我買其他平啲嘅都可以啦。」

Jack表示悦和一直陪著香港成長，由1945年札根於香港，見證香港工業轉型，並發展成一個國際大都市，笑說：「雖然好老土，但我哋真係體會獅子山精神，我哋打不死㗎。」

今年年初他曾目擊有其他醬園被收回，推土機鏟爛醬油甕缸，豉油流得滿地皆是，Jack有點傷感：「宜家依個年代真係好搞笑嘅，好多嘢都係你唔到執笠嗰日，都唔會有人知，我就唔想有依個情況發生。」他未來只求能繼續經營悦和，「我哋要燃燒到最後一刻，最好就梗係可以燃燒落去啦，就算唔得，我都要燒到最後一刻。」

悦和醬園於1945年在荃灣德士古道設廠，1973年因荃灣新市鎮發展，將廠房搬至上水古洞。50年後，悦和因古洞北新發展區需搬遷。第二次面對發展，悦和重置廠房之路困難重重。

記者：林諾暄
攝影：梁栩焮、林諾暄

版權: 禁止衍生