張兆輝霸氣做「大佬」　「老婆」胡杏兒讚演技了得

藝人張兆輝和胡杏兒齊出席首度結緣的電影《困獸》首映禮，圈中好友楊玉梅、胡鴻鈞、丁子朗及《聲夢傳奇2》參賽者文佐匡等入場支持。張兆輝表示會與吳啟華，陶大宇組男團到佛山唱騷，問到男子組可會騷肌演出？他就謂：「我哋着西裝，啲男人味就走晒出嚟啦。」

杏兒大讚飾演其老公的張兆輝演技了得：「好難有呢個機會。」又指在新片其角色好特別，雖然是演江湖大嫂，但少霸氣，以溫柔居多：「係新挑戰，好多內心戲。」而飾演社團大佬的張兆輝就話角色是新嘗試：「好型又有威嚴。」又指其中一場動作戲拍足7至8日，有爆破又要淋雨，亦曾因打鬥戲太激烈而受傷，但堅持負傷頂到最後。

剛和老公在日本慶完生返港的杏兒，指今次撇低3位寶貝仔和老公過6日二人世界，問到是否趁機造人？她怕怕謂：「冇呀，我哋每年都有二人世界嘅，老公送咗個旅程畀我做生日禮物，（兩公婆玩乜？）冇玩機動遊戲，都係食嘢啦，我肥咗8磅。」

稍後將偕「胡說八道」的圈中姊妹到洛杉磯及三藩市登台的杏兒，問到不用收身減肥？她即說姊妹團見其食物相也問她可擔心身形，不過她有信心可極速減磅，問到以女團身份登台，可會性感造型演出，她就推波給團友黃智雯：「交畀佢性感擔當，台慶嗰晚佢咁性感，不過我啲衫都ok嘅，唔係露就係性感嘅。」又謂老公和囝囝就會同行登台，25號聖誕節就落機留港過佳節。

女星邵美琪專程到場撐好友張兆輝，現正休息的她表示有興趣做幕前演出：「雖然有戲癮，但都要睇戲做定功課先，我成日都想做每個工作都有新嘅感覺。（想挑戰咩角色？）唔知呀，交畀導演同編劇去諗，睇佢哋想我做咩角色。」問她可心郁拍電視劇？她坦承之前與無綫及內地方面也有傾過，惜未成事。提到網民指無綫欠她一個視后獎，她聞言即說：「唔想攞，我唔知講咩，我唔識講，咁我多謝佢哋搵我（拍劇），唔一定要有獎，我享受拍攝嘅過程。」又指因演員也好戲，提議不要只得一個視后獎：「10個，獎係一個鼓勵，唔好限定得一個，六合彩都可以有10個人中啦，點解唔可以畀多啲？」

問到可有留意後輩的演技，她說有，但記性差，對後輩姓名還未有印象，又指新一輩的演技跟以前的表達方式不同：「有啲人覺得開心未必係笑，可能係喊，佢哋有好多新諗法，唔同電視台都有唔同嘅嘢。」她又笑言因要求高及太貴關係，所以無人問津：「我要有輝哥（張兆輝），又要有華哥（任達華）先再拍。（好難喎！）要有好劇本，好對手同好老闆先會接拍。」

東網網站 : https://on.cc/東網Facebook專頁 : https://www.facebook.com/onccnews/