出道多年，陳蕾圓夢踏上紅館舞台，以「向死而生」為題，帶觀眾走入一場視聽享受盛宴。
（我睇3/3第二場）
「曾固執對錯 這刻都只不過塵埃 放過你不如分開 你我愛得似乞丐」
一開場仙女戴上白色頭紗，配上悲情歌詞、棺木鋼琴，以戀愛結束為起點，虐心地開始死亡之旅。會場就好似進行一場大型儀式，赤紅色調加上地獄鬼怪圖像，天轟地烈，震攝內心，幾首歌背景一出已經令我wow一聲。
「不打擾你的富足美景 請你都不要干涉這種低慾望社會烏蠅」
震撼過後，豹哥霸氣地唱出對社會既控訴，為大家抒一口怨氣。緊接《神的不在場證明》同《熒光》蕾子企喺半空，彷彿化身天使送上溫暖，《念》更加聽到我熱淚盈眶，確切感受到歌詞帶出既愛，傷感時要先照顧自己，相信希望，前路永遠有光。
「難道要這麽痛教識我撐起 無論再多經歷也不被打死」
沉重心情稍為沉澱之時，陳蕾演繹一連串富正能量既作品，一步步療癒大家既心。世界的確有點崩壞，太多批判，太少鼓勵，但我地依然可以保持一顆樂觀既心，放下社會枷鎖，順住自己心意，做喜歡既事，好好活著。人無非都係想尋求自由、快樂，相信一切是最好的安排。
煩惱天天都多，但同時有美麗風景值得我地期待，未來發生咩事我地無法預知，唯有盡情享受當下，娛樂人生，不需壓抑。緊記身邊永遠有人同陳蕾既作品陪伴，你並不孤單。
「得失看開 喜愛都可以手到拿來」
到演唱會尾聲，平日熟悉搞笑有趣既蕾子終於出現，開開心心地演繹幾首作品，歡樂盡興。最後再以《凡星》完滿地落幕，提醒大家自己先係人生既主角，非常感動。
「平凡像我亦可 做我的主角」
演唱會編排順暢，感情連貫，陳蕾甚至連野都無講，令觀眾完全沉浸喺整個氛圍中。我特別喜歡今次既主題，道出人每日都向死亡邁進，時間非常寶貴，要珍惜同活得有意義，相當有啟發性。
再者，今次各種造型都十分搶眼，有齊氣質、型格、性感、可愛，蕾既表情、眼神同肢體動作同樣係世界級，一頭白髮更加錦上添花；
Visiual同燈光藝術成份重，整晚眼球不斷被震撼，而我最深印象係《熒光》，綠色既光線將歌曲力量穿透入心；
音樂方面，唔少作品用上新編曲，配上不同樂器，令人驚喜，「啲打」solo 同後段整排管弦樂團登場都係神來之筆。
「也許我沒法感受你的傷痛 只想親口講句 我愛你」
一踏上舞台，陳蕾就有種壓住全場既氣勢，歌聲充滿感染力，完美演繹出歌詞能夠為文字賦予更大力量，將滿滿能量傳遞比每位聽眾。 雖然蕾近日既言論引起唔少爭議，但單論演唱會絕對係世界級。
「片刻的歡樂竟可賭上了一世的罪惡 逃避過 留下一堆軀殼」
我大概三年前比《荒島之幻象》live吸引，之後開始留意蕾子，慢慢發覺佢有種好特別既魅力。 每當失意迷途時，總會想聽下聽佢既作品，為我分享情感，指引方向，仲帶嚟一點鼓勵扶持同快樂。
感謝陳蕾堅持做好音樂，成為大家黑暗中既曙光，照亮前路。佢既作品陪伴住樂迷渡過無數艱難時間，安撫心靈，有種將人從絕望中拯救既力量，樂壇社工當之無愧。
陳蕾世一！
片一：《我想和你好好的》
片二：《妖治時代》
片三：《下流社會》
片四：《當我迷失時聽著的歌》
片五：《神的不在場證明》
片六：《念》
片七：《窮人的薔薇》
片八：《娛樂人生》
片九：《凡星》
▼Follow hkpopculturelover
Instagram: https://www.instagram.com/hkpopculturelover/