【聖誕節】包你笑到崩潰的派對桌遊　潛烏龜版狼人玩過未？

話咁快隔個星期就到聖誕節喇，相信唔少人已經約好晒三五知己，準備開party玩通宵，過一個狂歡聖誕！開完大食會又交換好禮物之後，當然唔少得玩party game啦，當中最受歡迎嘅一定係狼人遊戲同「大電視」，不過得兩隻game又點夠玩成晚呢？以下推介嘅4個桌上遊戲同樣啱一大班friend玩，全部玩法都非常簡單，互動性高，今個聖誕不妨試玩一下。

以訛傳訛＋draw something

第一個介紹嘅桌遊叫《傳情畫意》，玩法似「猜猜畫畫」同「以訛傳訛」嘅混合版，參與人數可以有4至8人，大家先各自抽一個題目，再用圖畫表達，唔可以寫任何文字或數字，畫好之後就再畀下一個玩家估，估完又再畫，如此類推。過程中非常考驗玩家嘅畫功同想像力，而且最後揭曉答案嘅過程，保證會令全部人笑到肚痛！

唔準諗！即刻答！

如果玩家人數較多，又想玩反應類遊戲的話，就最啱玩《5秒定律》。這款遊戲人數冇特別上限，十幾二十個朋友一齊玩都得，而玩法亦相當簡單。玩家先輪流抽題目牌，上面會寫住「動物叫聲」、「不應在喪禮做的事」等題目，然後要在5秒內立即回答到3個正確答案。聽落非常容易，但加上時間限制後，玩家隨時會緊張到連基本常識題都答錯，隨時畀人笑到面黃。另外亦有關於個人嘅題目，例如：你擅長的事、讓你感到自豪的事，可以令朋友之間加深認識呢。

攞正牌出貓

除咗考反應，仲有一款鬥蠱惑嘅桌遊《作弊飛蛾》，這款桌遊和其他紙牌遊戲一樣，以出晒手上嘅牌為目標，最大分別係玩家可以係過程中「出貓」，用盡各種方法將手牌消失，例如將牌收係手袖或者掉落地下，令自己最快勝出，不過出貓之餘要同時避開「守衛」嘅監視。這款鬼馬桌遊最適合一班相熟嘅朋友一齊玩。

潛烏龜＋狼人

最後一款《犯人在跳舞》桌遊設計係變奏版嘅狼人，一樣有不同身分及功能牌，包括：「犯人」、「共犯」、「不在場證明」、「神犬」和「偵探」，最特別嘅係玩家可以利用功能牌，命令所有玩家抽出一隻卡牌，以「潛烏龜」嘅方式同其他人交換，玩家可以從中互換角色，例如犯人可以趁機賊贓嫁禍，再提示偵探指證，每局嘅變化都非常多，係個講求推理同策略嘅桌遊，有興趣嘅朋友不妨就係今個聖誕同朋友一齊試玩啦！