【搵食CONY】新派韓式素食、青口放題　邊款最抵食？

放題熱潮由呢兩個字一嚟到香港之後從無間斷，而一向有創意嘅香港人更加將「放題」概念發揚光大，設計出各式各樣主題，好似近日主打新派韓菜The Joomak就推出咗1.5小時限時任食青口煲，下星期三又即將推出素食放題。搵食CONY當然又係時候出馬為大家率先試食啦。

青口放題超鮮味

放題之所以咁受歡迎，某程度上因為佢同「抵食」呢兩個字掛勾，不過係咪每個放題都咁抵食呢？就真係要試過先知啦。The Joomak剛推出嘅青口放題，即日至5月31日逢星期一及二，可以$298於1.5小時內任食兩款全新青口煲，仲可以任嗌炸蕃薯條和薯條。

兩款全新嘅「泡菜蕃茄青口煲」和「牛油馬格利青口煲」單價為$268，所以放題價算幾抵食。不過放題每次上嘅份量都係單點嘅正常份量，頗為大份，如果得兩個女仔嚟食，嗌晒兩款未必食得晒，之但係食放題一定會想試晒兩款，所以呢樣嘢就要自己衡量返啦。

講返味道方面，兩款青口煲入面，CONY首推「牛油馬格利青口煲」，雖然煮法好似好簡單，不過用韓國米酒入饌其實非常少見，而且能帶出青口嘅鮮甜，完全展現到 Less is more嘅道理。至於泡菜蕃茄青口煲其實都好食，酸甜開胃嘅蕃茄配搭微辣嘅泡菜，令青口十分惹味。不過如果喜歡食辣嘅朋友可能會嫌唔夠辣，因為餐廳都想就返普遍香港人口味而將辣度調低。

配菜炸蕃薯條和薯條都係「厚切」，口感十足，而CONY比較鍾意食蕃薯條，因為更加香甜，而且炸蕃薯條喺坊間亦較少見。如果大家想飲埋嘢，加$38就可以任飲咖啡、汽水、鮮果汁等無酒精飲品，加$88更加可以任飲酒精類飲品及特飲，包括燒酒、紅酒、白酒、米酒等。

素食放題多選擇

除咗青口放題，餐廳又即將推出另一個素食放題，原來老闆好注重健康，仲特意設計出素食餐牌，當中有唔少菜式都好有心思。素食放題將於4月25日至6月30日逢星期三推出，同樣係限時1.5小時，只需$198就可任食素食餐牌內任何菜式（甜品除外），仲送一款素甜品，而任飲選項亦都同上述一樣。

喺十多款素菜菜式入面，CONY就試咗四款，當中必點嘅一定係「羽衣甘藍煎餅」同「素芝士南瓜甘筍熔岩包」。羽衣甘藍係近年好興嘅superfood，冇諗過用佢嚟做韓式煎餅係會咁好食，不但冇咗好多人都唔太喜歡嘅草青味，加入咗杞子更增加咗輕微酸甜味道，食落更加清新。而素芝士南瓜甘筍熔岩包絕對係翻本必食，因為佢單價售$268，而且當中有多款素食炸物，可以點素芝士同南瓜蓉一齊食，極之豐富，仲要係純素無五辛，各類型嘅素食者都啱食。

另外「柚子蜜炸韓蔘」都令CONY喜出望外，因為本小姐一向不太喜歡蔘味，但柚子蜜醬能中和韓蔘的苦澀味，變得清新美味。而「韓式甜辣素炸雞」口感不俗，但可能因為CONY放凍咗先食嘅關係，有啲太乾。同樣地，放題每碟菜式份量同單點份量一樣，要嗌多幾個朋友嚟先可以試多啲唔同菜式。

總括而言，講款式，素食放題絕對比青口放題更勝一籌，而且全日價錢一樣，唔似其他放題夜晚會加價。之但係青口質素高，每隻起碼有半隻手掌咁大，再加埋錢任飲飲品，同成班朋友嚟十分之chill。兩個放題都各有優點，CONY宣布打和！Super！

1.5小時限時任食青口煲

日期：4月16日至5月31日逢星期一及二（公眾假期除外）

價錢：$298加一

供應時段：全日

1.5小時素食放題

日期：4月25日至6月30日逢星期三（公眾假期除外）

價錢：$198加一

供應時段：全日

The Joomak

地址：尖沙咀廣東道17號海港城海運大廈3樓LCX 34號舖

查詢：2111 0851