阿爸借機催婚！唐詩詠打開雪櫃見愛貓嚇親

出名係愛動物嘅唐詩詠，近日新養咗隻貓仔「蛋蛋」，不時都幫萌貓影「寫真」放上IG同網民開心Share，令到蛋蛋嘅人氣急升儲落少粉絲！呢日佢就喺IG分享咗同爸爸嘅一段對話，詩詠就話一早起身諗住整隻蛋食，去到廚房一開雪櫃門，卻驚見另一隻「蛋」，而呢隻「蛋」仲係要有條尾喺到揈嚟揈去，睇落不知幾Happy添！

詩詠即時嚇到嗌咗出嚟，詩詠爸爸一聽見佢嗌就問︰「哎呀﹗點解佢喺入邊嘅？」詩詠就話︰「肯定趁你打開門，偷偷地走入去啦，你見唔到咩？」詩詠爸爸即時口窒窒，心虛話︰「今朝開…過，冇…吖，冇…見到佢。」當詩詠想再追問究竟蛋蛋喺入面幾耐之際，詩詠爸爸竟然「借尿遁」，再出返嚟就瞬間KO詩詠︰「女呀，湊BB容易過湊貓呀，今晚想食咩？」即刻搞到詩詠冇咁好氣，呢個結局真係估佢唔到！唔少網民都關心蛋蛋嘅情況問「佢有冇凍親？」、「咁識歎冷氣呀？」，詩詠仲答「唔願走」，認真爆笑！亦有網民認同爸爸說話，催詩詠快啲結婚生B！

東網網站 : https://on.cc/

東網Facebook專頁 : https://www.facebook.com/onccnews/