CONY以前每次去九龍城都係食泰國菜，不過近日再去，經過一向泰國菜館林立嘅龍崗道和南角道，行遠少少去福佬村道，先發現原來多咗咁多新餐廳，不論係中、西、日、韓、越統統有齊，猶如一條美食街。CONY仲發現咗一間位於5層高嘅獨立大樓內的日本餐廳，提供「一站式」嘅日本料理，可以一次過食到爐端燒、鐵板燒、壽司同和食，十分霸氣，當然要入去試試。
呢間名為「三和叙」的日本餐廳，名字中的「三」代表三款日式料理，包括壽司刺身、鐵板燒及爐端燒，「和」則指「和食」，而「叙」當然係指聚會。港人愛食日本菜一向係常識，不過質素好少少嘅日本餐廳，都會專注做某一種料理，好少可以一次過在同一餐廳食到晒咁多款料理，而呢度就可以滿足到乜都想食少少嘅人啦。
爐端燒
除咗最頂兩層係VIP房需預訂作私人派對之用，餐廳基本上有3層，每一層都分別主理不同料理。首先地下負責爐端燒，居酒屋式設計，以銅鐵板及木材為主要建材，設有吧台和卡位。爐端燒最重要係火喉，所以大廚用咗三款不同備長炭控制出完美火喉。CONY十分推薦牛舌，不但厚度十足有咬口，伴隨的蒜蓉芥末籽更具畫龍點睛之效。據聞飛驒和牛串和阿波尾雞翼係餐廳招牌菜式，可惜當日CONY冇試到，評唔到分。
鐵板燒及和食
一樓則主理鐵板燒及和食。設計以木材為主，色調柔和，座位則以型格的雲石吧台為主，靠窗位置亦設有沙發及茶几，感覺比較chill啲。餐廳主打時令海鮮，例如龍蝦、澳洲鮑魚及鱈場蟹等，以簡單調味呈現食材本味。呢層仲可以品嚐天婦羅及其他傳統和食。
壽司刺身
最後二樓就主打港人最愛嘅刺身、壽司。室內設計參考日本茶室風格， 並加入簡約時尚元素，除咗吧枱，靠近窗的位置設有私人用餐房間，不論想欣賞廚師大顯身手抑或想擁有私人空間都滿足得到。講到刺身，拖羅係CONY嘅all time favourite，不過呢度更加要食嘅係三文魚籽，經師傅加入柚子汁和醬油調味，最後以山葵蓉點綴，簡單而清新。
現時餐廳仍是試業階段。如果你有選擇困難症，想乜都食啲又唔想諗，可以試下佢哋設計嘅「秋季時令品餐單」，有齊各款招牌料理，不過每位要$1,880，喺九龍城嚟講算係幾貴。呢度仲有VIP房可以畀你一邊開party一邊嘆日本菜，估唔到九龍城而家都可以有如此高級嘅享受。
三和叙
地址：九龍城福佬村道46號
電話：2321 0867
