張栢芝督導兩子清潔泳池　Lucas蛻變小鮮肉晒腹肌

藝人張栢芝出名係廿四孝媽咪，近日趁住炎炎夏日帶咗幾名兒子去游水，仲將戲水相片及短片上載到社交網同網分享。片中大仔Lucas（謝振軒）半裸上陣，大騷腹肌，由昔日童真男孩蛻變成小鮮肉，游水時仲相當出力，呼吸聲大到細佬Quintus（謝振南）忍唔住扮佢，認真搞笑。雖然片中未見栢芝本人，但見拍攝角度，佢應該喺池邊望住兩個仔仔游水，經已氹得開心大笑，仲留言話：「早上游水健身體，畀佢哋搞到我笑到暈咗！」

游水後，栢芝教導兩子「自己游水自己做清潔」：「學習要自己照顧自己，長大後知道沒有什麼是必然的。工人姐姐心疼他們自己清潔，但我反而要我兩個仔照顧返（番）工人姐姐，可能他們現在不明白，長大後他們想知道現在的每一點一滴在哪裏。很多媽媽問我如何做到其實很簡單，風雨不改每天要他們堅持堅持再堅持堅持就是努力的獎賞，打少啲遊戲機。」另外，栢芝亦晒出浴缸照，裏面有鴨仔公仔伴浴，估計係為細仔Marcus（張禮承）洗白白。

東網網站 : https://on.cc/

東網Facebook專頁 : https://www.facebook.com/onccnews/