早起北上搵食　深圳兩大必食早餐店

早起的鳥兒有蟲吃，早起北上深圳嘅人有多一餐可以食！其實深圳都有唔少麵包店有高質麵包，買多個返香港第二日當早餐都好。

芋頭風繼續吹，台灣知名芋泥吐司深圳都有得買！位於美食中心區嘅「喜薈萃」係連鎖麵包店，深圳有多間分店。

呢度最出名就係多款口味嘅芋泥三明治，全部都係即叫即整，不過係常溫供應。

除咗芋泥肉鬆之外，仲有芋泥燻雞、咸蛋黃芋泥肉鬆及芋泥海苔肉鬆，價錢方面人民幣18至20元一份，不過要三文治每日10點到下晝4點半供應，想食真係要快手！

份量都幾大，芋泥綿密而且隱約有小芋頭粒，因為無加多餘糖，所以唔會好甜。

麵包店其他麵包都好有特色，芝士系列都好受歡迎。 

三順培根人民幣6元

深圳車公廟分店

地址：深圳市福田區泰然九路和深南大道交界金潤大廈一樓103舖 

交通：地鐵車公廟站C出口前行50米

營業時間：上午7時至晚上9時

另一間早餐店係外國過江龍Auntie Anne’s安緹安蝴蝶餅，呢間來自美國嘅連鎖蝴蝶餅品牌最出名就係巨型蝴蝶餅，有鹹有甜，配咖啡剛剛好。

餅店依然用美國麵粉製作，目前有5款口味，原味﹑玉桂﹑杏仁﹑意大利帕帕羅尼肉腸，同埋港人大愛嘅海苔絨絨。

咁大塊都係賣人民幣18至25元，唔怪得咁受歡迎！

唔鍾意咁大塊，佢都仲有迷你版細細粒，幾過癮，只係同前者一樣，佢係室溫狀態奉上，口感上可能冇咁脆，不過其中一間分店咁近口岸，一到步同朋友share食吓亦無妨！

怡景中心城店

地址：深圳市福田區怡景中心城店G層FG011A號（星巴克戶外旁）

交通：地鐵會展中心站B出口

營業時間：上午10時至晚上11時

撰文及攝影：沙拉