Ray Online｜何敬康與唯一偶像譚詠麟吃早餐　請教唱歌技巧

今日係2024年最後一日，大家仲有冇咩年度目標未完成呢？新民黨立法會議員何敬康今朝就同殿堂級歌手譚詠麟食早餐，令呢一日更加有意義，佢仲趁機請教唱歌技巧。

何敬康喺社交網站分享呢件開心事，形容同呢世人唯一嘅偶像「譚校長」食早餐，係最幸福嘅事！佢透露由6歲已經開始聽「譚校長」嘅飲歌，今時今日就算大個咗，都仲係追星小粉絲，見到「譚校長」仲會心跳加速！今次唔係見偶像咁簡單，原來佢哋仲有工作上嘅聯繫，何敬康話真係此生無憾。

請教唱歌技巧

把握食早餐嘅時間，何敬康同「譚校長」大談樂壇嘅過去、現在同未來，對於振興樂壇同演唱會經濟，請教咗「譚校長」喺內地同香港舉辦演唱會嘅細節。見到偶像當然都要爭取機會請教唱歌技巧，原來何敬康噚日喺中環街頭客串表演，大唱「譚校長」嘅《小風波》，得到原唱提供運氣等意見，何敬康應承會努力練習。展望新一年，何敬康希望有多啲機會見到「譚校長」，食飯又好飲咖啡又好，而最好就係喺演唱會舞台見到佢精湛又有活力嘅演出！

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)