眼前有份年薪超過16億港紙嘅合約，仲要一簽簽兩年半，分分鐘多過出生到而家嘅總收入，但代價係要喺一個文化完全陌生嘅國家，實力完全downgrade嘅聯賽度踢波。比着你係C朗，你會唔會去？
C朗拿度正式加盟沙地阿拉伯聯賽的球隊艾拿沙（Al-Nassr），據轉會專家Fabrizio Romano所指，艾拿沙同C朗新簽嘅合約，球員人工連同商業合作，C朗年薪迫近€200M，係足球史上最大價碼嘅合約。
或者呢單新聞唔算太爆炸性，畢竟世界盃期間，佢同曼聯解約嘅新聞已經搞到街知巷聞。喺英國《太陽報》極具爭議嘅記者皮爾斯摩根面前，C朗幾乎講盡曼聯壞話，盡顯佢要反面嘅決心。但之後佢同好多間歐洲球會傾過，冇一間球會願意簽返佢。與此同時，亦有傳C朗會去中東繼續職業生涯，對象正正係而家加盟嘅艾拿沙。
雖然C朗已經有退化嘅跡象，但係未至於完全唔能夠喺歐洲前列球會立足。自2018年歐聯三連冠後，C朗離開皇家馬德里，喺祖雲達斯大致保持狀態，回歸曼聯後更一度以救世主嘅的姿態，盡量為曼聯爭取積分。
呢單轉會震憾嘅地方，在於以C朗嘅級數，佢竟然選擇唔喺歐洲繼續獻技，而係將佢呢副尚具競爭力嘅身驅，帶到一個同主流球壇相差十萬八千里嘅聯賽效力。競技水準欠奉，又離開主流市場，佢嘅狀態又可以保持到幾耐？而比著你，又會唔會因為C朗嘅星味，而多咗關注沙特阿拉伯嘅聯賽？相信答案好清楚。
故此，C朗呢個決定最大嘅意義，係宣示佢已經唔係當初嗰個充滿競爭心嘅超級巨星。事實上，C朗2022年過得極差，兒女夭折、球隊物是人非、世界盃出局，令佢心靈受到極大嘅折磨。人喺呢個階段，會出現心態上嘅轉變，亦都無可奈何。
睇睇巴黎聖日耳門做，PSG嘅財源都嚟自中東，手握美斯、麥巴比、尼馬三大巨星，係最能代表金錢足球嘅例子。據《馬卡報》所指，麥巴比今年同PSG新簽嘅合同，就有€180M嘅簽約獎金。美斯雖然冇簽約獎金，但佢稅後都有€41M嘅年薪收入（包括球會合作項目、忠誠獎金等等），換算起嚟每週嚟自PSG嘅收入迫近80萬歐元，已經算係超級高薪。
但老2年嘅C朗，喺艾拿沙得到嘅人工，係美斯嘅4至5倍，人生冇幾可有咁嘅賺錢機會，又唔係要佢作奸犯科，吸引力梗係大。而呢個決定，對佢退休後發展個人品牌嘅商業歷程，更加籌得一筆難能可貴嘅鉅款。咁又有何不可呢？
嚟緊2023年年頭，C朗已經到38歲，就算留喺主流聯賽，都難以擔保C朗可唔可以保持頂級狀態，為所屬嘅球隊爭取更多獎盃。倒不如提早承認現實，轉換生涯目標，用最後嘅球員時光，搵最大嚿嘅錢好過？
不過，可以肯定嘅係，我哋呢代睇住「絕代雙驕」成長同衰老嘅球迷，冇辦法見到C朗光榮謝幕嘅時光，對球迷嚟講絕對係損失。