過去一年生意宜靜不宜動，我也沒搞太多操作，學施生話齋「無為而治」，主要周圍去旅行居多，人太耐無寫字，腦筋開始遲緩，新一年決定寫番密啲，純粹當做腦力訓練。
早兩日同某工廈大王食飯，我作為後輩，看到工廈大王無穿無爛，談笑風生，於是直接問佢有何心得，大王笑笑口話：「兩個字講晒：無債！」事關其名下一連串工商早已供滿，難怪如今笑看風雲。
廣告（請繼續閱讀本文）
早幾年利息非常平，你有錢冇錢都好，擺喺銀行近乎零利率，借錢利息平，所以唔理各行各業做咩生意都好，多少都會問銀行借錢。
據我嘅認知越有錢嘅人係借得越多，今時今日棒打落水狗嘅新世界，就係一個例子，但係只可以講佢豪賭一鋪，不過結局係賭輸咗，佢借錢嘅時候邊估到你利息升得咁勁，如果而家依然係零利率，鄭家可能會變咗做神話。如果有如果。
當然，我最想知嘅係工廈大王嘅心法，點解當年利率咁低咁吸引，佢依然可以把持得住唔借？
廣告（請繼續閱讀本文）
「阿爸教落，如果可以full pay就唔好借錢，有幾大個頭就戴幾大頂帽。」知易行難，現實係好多人十個煲得五個蓋，所以利率一轉向就立即出事。
我過去一年都見勢色唔對，全力減債，物業總數減少了，買賣輸了差價，roughly 輸了20%，但勝在如今無債一身輕，可以食餐安樂茶飯。
新一年，祝各位讀者有債減債，無債無憂。
廣告（請繼續閱讀本文）
Subscribe FORTUNE INSIGHT Telegram:
http://bit.ly/2M63TRO
Subscribe FORTUNE INSIGHT YouTube channel:
http://bit.ly/2FgJTen