陳柏宇新年後首亮相夾公仔　90秒內成功夾到4隻Kuromi

向來喜歡夾公仔的陳柏宇（Jason），今日（8日）亮相屯門市廣場為全港首個夾公仔大賽初賽擔任揭幕嘉賓，他更即場示範90秒成功夾到4隻Kuromi公仔的秘技。Jason平時經常與女兒玩夾公仔機，更曾經網上爆seed鬧爆無良夾公仔舖頭當他水魚，他笑言玩遊戲除了講求技巧，最重要是心態，失敗後再調整戰術，慢慢就會上手，以及「必須要有資源。」

陳柏宇在新年後首度現身出席活動，一出場即時引得現場粉絲及圍觀市民歡呼，Jason率先大展身手參加夾公仔挑戰，大曬最強夾公仔技巧，並成功夾走多隻可愛爆燈的人氣角色毛公仔，更揚言要把它們全部帶回家「進貢」給愛女！Jason他直言屋企樓下有很多部夾公仔機，他會教導女兒如何拖長時間來玩，讚家姐擁不屈不撓精神，會不計成本誓要夾到為止，他苦笑說：「所以必須要有資源。」

被問到有何心得，Jason即時一臉認真：「我自己私底下都好鐘意夾公仔，都有啲研究嘅！夾公仔除咗講技巧之外，最重要反而係個心態，每次失敗咗就要再調整戰術，慢慢就會上手。同埋我覺得今日場內夾公仔機啲夾都調較得好好，絕對唔係嗰啲好鬆、冇力嘅夾，相對上會容易處理，咁樣已經成功咗一半啦！同埋今次夾公仔大賽，參加者限時內可獲無限代幣瘋狂任夾，對夾公仔迷嚟講絕對過癮！」

去年Jason曾經在社交平台上載一間夾公仔機舖的照片，怒轟自己被當水魚：「個夾未上到去，個頂已經鬆手，咁我寧願你教（校）鬆啲個夾，咁起碼我都仲覺得我有一線生機。大佬呀，你喺上面咁樣鬆手，你有冇良心㗎？生勾勾咁呃咗我$25（元） …」帖文引起網民共鳴：「好認同陳生啊，香港夾公仔機個夾到頂就放根本當人水魚」、「呢間嘢係呃人㗎，$25都唔應該捐俾佢」、「陳生講中晒我們的心聲」。

Jason將於下星期於會展舉行《LIFE IS LIVE》演唱會2025，他卻表示不用閉關。「因為我一路做綵排，唔會負荷把聲，同埋今次活動好簡單，之後我就會休息。」他試過在台上差錯腳跌倒，笑言現在腳力好過以前，又透露演唱會歌單共有三十多首，好多經典歌重現，包括很少唱的兒歌《魔法戰隊》。「大家都好希望聽到呢首歌，平時唱唔係好適合，只有演唱會適合。歌衫好靚，不過仲有兩套衫未有機會見到，我驚會令到你哋噴血。」