【理財教室】期油價格暴跌關你事　車用燃油會跟住跌？

石油需求大幅收縮及市場憂慮庫存空間即將爆滿，紐約期油價格早前史無前例跌至負數，震盪金融市場。

石油明明係有價值的商品，點解可以跌至負數？係咪代表消費者去油站入油會有錢收？今時今日，如果消費者唔想再捱貴油，究竟邊個油站入油最抵？等本欄同大家逐一探討。

兔兔：熊大，早排睇新聞講紐約期油跌至負數，點解可以跌至負數？背後係一個咩概念？

熊大：油價下跌反映供過於求，跌至負數即係代表供應極度過剩。紐約期油係一種衍生工具，係需要進行實物交易的合約。當合約到期，投資者可以選擇交收或不交收，如果選擇交收，就要承擔相關運輸及儲存成本。例如紐約期油每張合約1,000桶，以實物交收的話，當中牽涉到1,000桶油儲存成本問題。

熊大繼續說：如果投資者唔想承擔相關成本，就會出現割價拋售合約的現象。紐約期油低見每桶負40.32美元，即係意味期貨持有人願意將每桶貼錢40.32美元，都要將手上的票據轉售，好過自己買入石油，再另外支付儲存成本。

兔兔：咁負油價呢種情況係咪好罕見？

熊大：其實呢個情況係歷史上冇出現過。目前石油供過於求，個別地區的原油儲存空間明顯唔夠，當石油持續泵出嚟但又冇人要的時候，原油生產商就會寧願貼錢畀消費者將油攞走，都好過自己搵地方儲存石油，呢個時候就有機會將期油價格推至零，甚至係負數。

兔兔：油價跌到咁低，係咪好抵買？

熊大：首先要搞清楚油價跌到咁低係咩原因。正如我頭先所講，主要係因為供過於求的問題，先至會拖低其價格，而呢個問題短期內都解決唔到，相信油價低迷仲會持續多一段時間。而喺行業未出現轉捩點之前，其實投資石油相關產品都有好大風險。

兔兔：點解香港的車用燃油價錢唔會跟住油價大跌？

熊大：香港使用的車用燃油主要係汽油及柴油，同國際油價中的原油唔同。而車用燃油的價格一向由油公司決定，國際油價大跌令油公司的部分成本下降，但唔代表車用燃油的跌幅會同國際油價的跌幅一致。

熊大繼續說：雖然車用燃油跟原油價格走勢有一定的關係，但因為本地政府參考的國際油價指標係新加坡無鉛汽油和車用柴油離岸價，而唔係紐約期油或布蘭特期油，所以國際油價大跌對本地車用燃油價格唔會構成太大的影響。

兔兔：咁我又想問，雖然本地車用燃油價格冇跟住國際油價急跌，但如果我想節省入油成本，而家邊個油站入油最抵呢？

熊大：根據消費者委員會網頁（https://www.consumer.org.hk/）的資料顯示，普通汽油最抵的係中石化，每公升售價$13.54，最貴則是Shell同加德士，每公升售價$15.64。至於柴油，最低價錢係Esso，每公升$10.8，而加德士、中石油、中石化，每公升售價都係$11.3。