自爆百厭童年！王梓軒偷代幣畀阿媽鬧爆

今日是母親節，身在洛杉磯的歌手王梓軒雖然未能返港同媽媽慶祝，孝順仔和他老友Jon Ong聯手翻唱咗Ben Folds的《Still Fighting it》，MV有兩段童年時與媽媽的珍貴片段，相當溫馨！

梓軒說：「點解會揀呢首歌送畀媽媽，因為首歌係講父母對小朋友嘅期望同愛，長大從來都唔容易，家長會同小朋友一一面對，歌者好期待小朋友長大可以睇返轉頭，笑住回顧，首歌令我有好多聯想，令我想到媽媽喺我成長過程中嘅教導同愛護，同埋呢首歌好好聽，配合埋喺《梨泰院》個劇度再出現就特別好聽，亦都令到我諗起依家好困難，但我哋都可以展望未來，繼續追尋夢想。」

身處美國　未能慶祝母親節

他坦言因為身在美國，今年不可以跟媽媽慶祝母親節，以往會送花、陪她食飯，但今年送此歌給媽媽更加有誠意，他又委託了細佬多照顧媽媽。

「返到屋企嚟料」

談及MV中的童年片段，梓軒說：「我細個都幾百厭，有一次我去機鋪打機，唔係好壞嗰啲，類似乜乜樂園，打到咁上下就嚟冇命，手快快攞咗隔離小朋友啲代幣嚟救命，個小朋友好大反應話『偷嘢！偷嘢！』我真係冇心嘅，我即刻還番畀佢，佢唔要仲即刻告狀，叫爸爸媽媽嚟，當然我阿爸阿媽都要嚟啦！我好深刻嘅就係當時阿媽冇喺人哋面前鬧我，仲維護我話『一定係誤會，我個仔唔係咁！』而返屋企嘅車程亦都唔出聲，但一返到屋企就真係嚟料喇！我嗰時得12歲，依家都歷歷在目！」

東網網站 : https://on.cc/

東網Facebook專頁 : https://www.facebook.com/onccnews/